“Joven Ida Mate Tanba Satan Krime”

.

Jornal Timor Post - Tersa-feira, 26 Fevereiru 2013 

Jorge Ribeiro, tinan 19, joven husi bairo aitarak-laran, tenki lakon vida moris tanba deit ho intensaun satan grupu balun ne’ebe baku ninia kolega. 

Akontesementu ne’ebe akontese segunda, (25/2) maizumenus tuku 18:00 iha area Aitarak-Laran, Palasiu Prezidenti nia oin, konsege halo trauma komunidade ne’ebe hela besik fatin ne’eba no mos halo sirkulsaun transporte engarafamentu (macet). 

“Ami lahatene derepenti ema sona nia (Jorge) latan hela iha ne’e,” hateten komunidade sira ne’ebe mak asiste hela mate isin bainhira Polisia investigasaun no Forensik foti hela dadus mate isin Jorge. 

Tuir kronoligia akontesementu, problema ne’e hahu kedas husi Distritu manufahi, same, hafoin lori to’o mai kapital Dili hodi buka malu to’o oho malu. 

Maibe tuir vitima nia familia katak, durante ne’e matebian la envolve problema ruma, maibe tanba iha loraik ne’e, grupu hamutuk ema nain lima ataka kedas vitima nia kolega ida iha parte Aitarak laran baku to’o dollar didiak. Hafoin vitima ba sorin maka grupu nain lima ne’e lori tudik sona fali Jorge nia kotuk laran to’o mate fatin. 

“Ema baku malu, nia sei kous nia maun nia oan, maibe la kleur nia halai ba atu sorin, make ma sona fali nia,” dehan vitima nia familia. Hafoin ne’e, familia sira kontaktu kedas polisia, la kleur deit, tuir komunidade sira katak, Polisia to’o hodi halao kedas asaun buka tuir suspeitu hirak ne’ebe mak deskonfia sona Jorge. 

“Ohin ami kaer kedas suspeitu nain lima lori ba eskuadra aimutin, no hetan mos faktus tudik ne’ebe maka hodi sona vitima ne’e,” membru Polisia ida hateten. 

Hafoin ne’e, polisia investigasaun no forensika halao tiha ezame ba matebian hodi hatama ba kappa, nune’e tula kedas ho kareta forensic lori ba Hospital hodi submete ba prosesu autopsia. 

.