“KAK Hetan Ameasa Husi Ema Deskonesidu”

.

Jornal Nacional Diario - Sesta-feira, 22 Fevereiru 2013 

Komisariu no Funsionarius balun iha Komisaun Anti Korupsaun (KAK), sempre hetan ameasa directa no indirecta husi ema deskonesidu, tanba ladun satisfeitu ho KAK ne’ebe maka halo investigasaun ba kazu korupsaun sira balun komete. 

Komisariu Aderito de Jesus Soares, rekonese maske hetan ameasa maibe KAK lahakfodak no tauk, tanba hala’o servisu ba interese publiku hodi oferese lialos no justu. 

“Dala ruma ami simu mensazen (SMS) ne’e normal de’it, tanba ita fo fiar ba publiku i publiku mos hakarak ita servisu diak, ne’ebe ami hanoin ida ne’e normal deit baa mi,” hateten Komisariu Aderito de Jesus Soares ba Jornal Nacional Diario iha Farol, Dili Kinta (21/2). 

Wainhira husu kona ba konteudo SMS ameasa, komisariu ne’e la esplika detallu, maibe hateten de’it katak, iha relasaun ho kazu sira ne’ebe mak durante ne’e KAK halo ona investigasaun. 

Maske desde estabelesementu KAK, to’o oras ne’e Komisariu sira seidauk iha seguransa, maibe Komisariu KAK ne’e esplika katak, sei kordena ho entidades kompotentes para bele haree kestaun seguransa hodi asegura ba komisariu sira nia vida. 

Entertantu, fonte ne’ebe mak lakohi publika nia identidade ba publiku informa ba jornalista katak, ameasa ne’ebe mak husi ema laiha responsablidade, ne’ebe balun emprezarius, balun sira uza fali ema jovens no balun mos mai husi ema funsionarius governu nian. Fonte ne’e informa tan katak, aleinde komisariu sira hetan ameasa, dala ruma mos funsionariu KAK nian mos hetan ameasa no piadas oioin, ne’ebe mak directamente no inderecta, ameasa derecta mak hanesan foin lalais akontese iha Komoro. 

Wainhira komisariu sira fila husi airoportu Comoro, iha motorizadas porvolta tolu hanesan ne’e, halai haleu tiha komisariu nia kareta, depois motorizada husi kotuk, ne’e maka baku komisariu nia kareta. Entertantu, husi sms ne’e, dala ruma sira tolok komisariu no funsionariu sira. 

“Imi KAK sira ne’e hein de’it, aban bain rua mak imi haree imi nian, balun fali dehan, KAK sira ne’e aban bain rua pistola musan ida sikat iha sira nia ulun mak foin sira hatene,” fonte ne’e haktuir lia fuan husi sms ne’e. 

Nune’e, tinan tolu eziste KAK komesa investiga ona kazu ne’ebe ho relasaun korupsaun, abuzu de poder no mal administrasaun hamutuk 16 no ninia prosesu sira ne’e haruka ona ba Ministeriu Publiku atu submete ba justica. 

Nune’e mos membru governu balun ne’ebe mak KAK bolu no presta ona sira nia deklarasaun maka hanesan Ministru Transporte e Telekomunikasaun Pedro Lay, eis Ministru Edukasaun Joao Cancio Freitas, Ministra Finansas Emilia Pires, Directora Jeral Hospital Nasional Guido valadares (HNGV) no mos funsionariu publiku balun.

,