“TL-Australia Hakotu CMATS”

.

Jornal Timor Post - Tersa-feira, 19 Fevereiru 2013 

Governu Timor Leste (TL) no Astralia sei akotu Certain Maritime Arangement in The Timor Sea (CMATS) ne’ebe durante ne’e la susesu halo negosiasaun Greater Sunrise (GS) mai TL. 

Ministru Petroliu no Rekursu Minarais (MPRM) Alfredo Pires hateten, tratadu CMATS depende ba governu Timor Leste ho Australia wainhira parte rua ne’e deside dehan la kohi ona entaun hein fulan 3 maka mate. 

“Ita deklara tanba iha tratadu iha kualker momentu, se bele deklara iha 24 Fevereiru ou 20 Maiu ka 28 Novembru konforme deit,” dehan Alfredo ba Jornalista sira, iha Parlamentu Nasional (PN) foin lalais ne’e. 

Alfredo haktuir, se Australia maka hakarak deklara uluk, entaun nia mos bele deklara ne’e ba CMATS. Agora dadaun ne’e, Tuir Alfredo katak Governu analiza hela vantazen no dezvantazen akordu ne’e ba Timor Leste. 

“Se diak ba ita, diak to’o iha ne’e? Se akordu ne’e nafatin, ita sei lao nafatin akordu ne’e bele rezolve duni problema greater Sunrise ou solusaun ida ne’ebe ita satisfas ka lae? entaun ida ne’e maka governu halo hela ho parseiru Australia sira, tanba ne’e, tratadu entre governu ho governu,” esplika Alfredo. 

Governu sei defende nafatin Timor-Leste ninia interese, ne’eduni governu sei tetu hela no hatene pozitivu no negativus ba CMATS nian. 

“Agora ita koalia hela ho ita nia vizinhu, dehan katak, loron 21 no loron 22, Ministru Minarais husi Australia nian mos sei mai vizita atu koalia ho Ministeriu Turizmu no sei koalia mos ho SEPFOPE atu haree Timor oan sira ne’ebe sei bele ba servisu iha Australia depois sei dada lia ho hau kona ba minarai nian,” dehan Alfredo. 

 Alfredo hateten, Timor Leste nia pozisaun klaru, hakarak solusaun ida ne’ebe fo igualidade ba rai rua ne’e tuir tratadu nian, maibe Timor Leste sei haree hela sasan barak kona ba dokumentus isra ne’ebe iha. 

.