“JSMP Gava Ana Pessoa”

,

Jornal Nacional Diario - Kuarta-feira, 27 Fevereiru 2013 

Organizasaun Naun Govermental (ONG) Judisial Sistem Monitorin Programa (JSMP) gava servisu Procurador Jeral da Republika (PJR) Ana Pessoa Pinto halo mudansa signifikan iha Ministeriu Publiku nia laran. 

Direktur JSMP Luis de Oliveira Sampaio hateten, mandatu ba PJR Ana Pessoa Pinto sei remata iha tinan ida ne’e nia laran, tanba ne’e atu kontinua ka la’e depende ba desizaun Prezidenti da Republika, maibe faktu hatudu katak durante Ana Pessoa Pinto nia mandatu, hatudu duni mudansa signifikan. 

“Mudansa ba asuntu administrasaun, hasa’e kualidade advogadu,” Luis de Oliveira Sampaio informa ba JNDiario, segunda (25/2) iha nia servisu fatin Kolmera, Dili. 

Tuir Luis de Oliveira Sampaio, mudansa ne’ebe mak durante Ana Pessoa Pinto hatudu nunka akontese antes Ana Pessoa assume pasta PJR. Director exekutivo JSP ne’e konta katak, durante ne’e JSMP nia haree, Ana Pessoa Pinto, hala’o ninia kna’ar ho didikadu teb-tebes iha nia servisu inklui hala’o nia kna’ar ho professional tebtebes, mesmu Ana Pessoa Pinto becgroung ema politiku. 

Aleinde servisu ho didikadu no profesionalismu, Ana Pessoa mos hala’o relasaun ne’ebe diak ho entidades hotu-hotu, hanesan sosiedade sivil, media no seluk tan. Haree ba prestasaun Servisu PJR Ana Pessoa Pinto nian, JSMP optimista katak iha mandatu foun, se Ana Pessoa Pinto la eleitu hikas mos, nia (Ana Pessoa-red) kuda ona bazet balun iha instituisaun Ministeriu Publiku nian, nune’e bainhira nia mandatu hotu, iha ona ema barak ne’ebe aprende ona buat barak, nune’e iha ona ema hodi troka nia pozisaun. 

Iha futuru mai PJR foun tenki mai husi ema kareira professional husi Ministeriu publiku laos ona ema politiku, tanba iha tinan 2010 Parlamentu Nasional altera ona lei kona ba requizito sai PJR. PJR Ana Pessoa Pinto antes sai PJR aktivo iha vida Politika, iha Partidu FRETILIN, hafoin ne’e hetan fiar husi eis Prezidenti da Republika Jose Ramos Horta, hodi sai PJR iha tinan 2008. 

.