“Uza Forsa Lori Fila CPD-RDTL Ba Sira Nia Knua”

.

Jornal Nacional Diario - Sesta-feira, 25 Janeiru 2013 

Reprezetante povu iha Parlamentu Nasional (PN), husi Bancada FRETILIN, Inacio Moreira, sujere ba governu konstitusional dala lima atu uza forca hasai grupu CPD-RDTL ne’ebe lakohi fila husi Sub Distritu fatuberliu, Distritu Manufahi ba ida-idak nia knua. 

 “Hau husu atuasaun ninian ne’e dala ikus ona, tanba labele duni ona, ne’e mak hau hakarak sujere,” sublinha Inacio Moreira, Kinta (24/1) iha Parlamentu Nasional. Maske nune’e, Inacio hatutan, governu sei iha tempo atu halo negosiasaun ho maneiras hotu-hotu ba sira, koalia ho CPD-RDTL sira halo didiak para sir abele fila ona husi fatin ne’eba. 

Nia haktuir, grupu CPD-RDTL ba konsentra aan iha Distritu manufahi ne’e la sala buat ida, maibe sira ba atu servisu duni, pior liu mak, Inacio dehan, CPD-RDTL organiza iha fatin ne’eba laiha koinesementu husi Governu, tanba ne’e mak governu konsidera hanesan illegal no sai problema. 

Nia akresenta, primeiru Ministru Kay Rala xanana Gusmao mos hatene problema ne’e, no PM xanana rasik buka maneira oi-oin hodi husu kompriensaun ba grupu CPD-RDTL atu bele buka solusaun ida ne’ebe diak liu. 

Entertantu, antes ne’e mos Primeiru Ministru Kay rala Xanana Gusmao fo ona ultimatum ba grupu CPD-RDTL, ne’ebe lideradu husi Antonio Aitahan-Matak, atu organiza nia ema sira ne’ebe okupa rai iha Welaluhu hodi fila-fali ba ida-idak nia knua, nune’e halo atividade hanesan bai-bain. 

Primeiru Ministru xanana Gusmao mos hatutan, membru CPD-RDTL sira laos mak liu fali konstituisaun RDTL nian, tanba ne’e sira tenki fila ba sira nia fatin hodi halo kooperativa iha sira nia knua. 

.