“PM Xanana Taka Odamatan Ba Membru Governu no FP”

.

Jornal Nacional Diario - Kinta-feira, 24 Janeiru 2013 

Primeiru Ministru Kay Rala Xanana Gusmao, Tersa (22/1) fo orientasaun ba nia gabinete hodi haruka seguransa civil taka odamatan ba membru governu no Funsionariu Publiku (FP), ne’ebe mak hala’o kna’ar iha palacio Governu tama servisu la tuir oras ne’ebe estabelese. 

Fontes ne’ebe lakohi fo sai nia identidade ne’e konta katak, Primeiru Ministru xanana Gusmao, tama servisu oras tuku 7:30 dadersan, depois nia ba tur iha eskritoriu laran to’o tuku 8:00 mak nia manda fila fali nia gabinete haruka seguransa sira taka odamatan ba FP no membru governu ne’ebe mak tama servisu tarde. 

 “Primeiru Ministru maka haruka ninia gabinete haruka ami taka odamatan ba funsionariu publiku ne’ebe mak tama tarde,” dehan tenik fontes ne’e. 

Tuir observasaun JNDiario nota katak, seguransa sira mak hamriik hein hela odamatan boot, atu trava ema ne’ebe mak hakarak tama ba palacio governu laran, relasiona ho problema taka odamatan ne’e. 

Ba kestaun ne’e, deputadu husi Bancada FRETILIN Estanislau da Silva iha uma fukun Parlamentu Nasional konkorda ba Primeiru Ministru atu taka duni odamatan ba FP no memebru governu ne’ebe tama servisu iha palasiu governu la tuir oras. 

“Hau laos atu hanorin fali PM xanana Gusmao, nia taka odamatan ne’e iha razaun ruma, hau hanoin nia atu hatudu katak, funsionariu sira atu mai servisu ho oras, maibe hau hanoin labele taka odamatan deit, tenki hola medidas administrativa to’o disiplinar para hodi fo ezemplo ba funsionariu se-seluk,” esplika deputadu FRETILIN ne’e relasiona ho PM Kay Rala Xanana Gusmao taka odamatan ba ninia funsionariu. 

Estanislau hatutan tan, iha lei Funsaun Publiku ninian hateten katak, funsionariu tenki tama servisu tuir oras ne’e determina.

,