“Xanana sei Lalin CPD-RDTL Fila”

,

Jornal Timor Post - Kuarta-feira, 23 Janeiru 2013 

Primeiru Ministru (PM) Kay Rala Xanana Gusmao hateten, depois aprova orsamentu Jeral Estadu (OJE) 2013, governu sei lalin membru CPD-RDTL iha Fatuberlihu, Distritu Manufahi ba ida-idak nia hela fatin. 

“Depois orsamentu Jeral Estadu hetan aprovadu, hau ba ho kareta tula sira iha Welaluhu ba halo koperativas iha ida-idak nia fatin, hakarak halo to’os ba halo iha ida-idak nia uma,” Xanana hato’o kestaun ne’e iha enkontru ho direjenti, inspetores, diretores no funsionariu publiku sira iha Centro Convensaun Dili, Kinta (17/01). 

Xefi Governu ne’e husu ba administradores Distritu Manufahi no Sub Distritu atu la bele premiti halo adjuntamentu ba membru CPD tamba organizasaun ida la liu konstituisaun RDTL. Hatan kona ba deklarasaun Xefi Governu nian, Porta Voz CPD-RDTL Gil Fernandes da Costa hateten, Konsellu Popular defeza-Republika Demokratika Timor Leste (APD-RDTL) konsidera esteitmentu ne’e hanesan lia fuan kroat hasoru CPD-RDTL iha transmisaun direta liu husi kanal TVTL iha CCD, Kinta (17/01). 

Maibe, nia dehan, organizasaun CPD-RDTL hanesan massa rezistensia ne’ebe iha publiku nasional no internasional rekonese, so uniku CPD-RDTL maka tuba metin ho politika restaurasaun TL ho objetivu atu hatuur loloos povu maubere nia istoria kona-ba luta libertasaun nasional. Kona-ba Xanana atu lori sira fila husi fatuberliu hafoin aprova orsamentu, Gil dehan, Orsamentu Jeral estadu ne’e kompetensia governu nian, maibe sira (CPD-RDTL) hamutuk ho veteranus no kombatentes libertasaun nasional ho OPTT kontinua kaer ai-suak hodi atinji sira nia objetivu. 

 “Se ita kuda tiha fini sira ne’e, agora Primeiru Ministru hakarak atu muda ami sai husi fatin ne’eba entaun se mak atu kuidadu produtu sira ne’ebe kuda iha to’os laran,” nia esklarese. 

Nia esplika, Prezensa CPD-RDTL iha Fatuberliu la’os iha orgaun estadu nia leten no laos atu hodi buka pozisaun social manan osan boot hodi sai previliziu iha Timor Leste, maibe atu hasae produsaun iha rai laran. “Irmaun xanana nia ameasas ho F-FDTL no PNTL ba veteranus no kombatentes ne’ebe hala’o atividade kooperativa produsaun agrikula iha Fatuberliu, ne’e ami konsidera hahalok sintoma dutadura hodi dezafia tebes CPD-RDTL,” nia lamenta. Gil esklarese, CPD pronto atu simu konsekuensia hirak ne’ebe mosu iha sira nia leet. 

 “Ami husu Xanana halo kontaktu ho CPD-RDTL ne’ebe hatama ona dokumentus ofisial ne’ebe haruka ona ba Xanana iha 16 Janeiru 2013,” nia rekomenda. Entertantu, Gil Fernandes hateten, FALINTIL-Forca Defeza Timor Leste (F-FDTL) ho batalaun ida ne’ebe halo ezersisiu Kobra durante loron 15 iha Suku welaluhu, Distritu Manufahi la fo impaktu ba membru CPD-RDTL ne’ebe hala’o atividade koperativa agrukula. 

 “Tuir informasaun ne’ebe ami hetan katak, F-FDTL ho PNTL aranka nab a Welaluhu, prezensa ne’e atu halo ezersisiu (Latiahn Kobra), tanba ne’e, prezensa F-FDTL ho PNTL ne’e la’os atu halo kapturasaun hasoru atividade ne’ebe maka CPD-RDTL halo,” informa Gil iha konferensia imprensa ba Jornalista sira iha sede CPD-RDTL, Balide, Dili, Tersa (22/01). 

Tuir Gil, durante ne’e CPD-RDTL laiha problema ho forsa no komunidade sira tanba misaun CPD iha ne’ebe hamutuk ho veteranus no antigu kombatentes para atu halo koperativa, nune’e bele hametin ou hasa’e produsaun agrikula ba ekonomia Timor Leste. 

Nia esplika, ekonomikamente TL agora dependenti liu produtu importasaun husi rai liur.

,