“FOK Hirus Oportunista Aproveita Bolsa Estudu”

.

Jornal Independente - Kinta-feira, 24 Janeiru 2013 

Organizasaun Faluk Oan Kiak – FALINTIL (FOK-Falintil) kritika ho hirus tanba governu failha kontrola ema oportunista ne’ebe aproveita Bolsa estudu husi estadu ba veteranus no martires luta libertasaun nasional nia oan sira. 

Tan ne’e, Prezidenti Interino organizasaun Fok-Falintil Natalino de Jesus hateten, bolsa estudu ne’ebe mak governu promete ba veteranu, martires sira nia oan seidauk senti nia benefisiu. 

“Ministeriu Edukasaun, Ministeriu Solidaridade Sosial, tau ona Bolsa de Estudu ba rejistensia nia oan sira maibe to’o agora ami la senti katak benefisiu ne’e ba ema nain hira ona, ami la kumpriende,” dehan nia ho tristeza. 

Natalino dehan, FOK-Falintil eziji atu governu esplika Bolsa estudu fo ona ba ema oan kiak nain hira no iha nivel edukasaun saida deit? Tanba tuir nia, bolsa estudu ne’ebe mak governu fo ho intensaun ba veteranus no martires nia oan maibe ema oportunista mak aproveita ne’e injustisa boot, presiza investiga. 

“Hahalok nepotismu ne’e ami kontra, sira uaza deit oan kiak, rejistensia sira nia naran maibe benefisia ne’e ba fali ema seluk,” dehan natalino. 

Entertantu, antes ne’e, Ministru Edukasaun Bendito Freitas deklara katak, nia parte deskobre ona ema balun ne’ebe mak laos veteranus no martires nia oan maibe hetan bolsu estudu husi governu hodi veteanu nia naran. Bendito dehan, husi numeru 543 ne’e, bainhira investiga veteranus nia oan loloos ne’e 47, seluk ne’e la’e. 

.