Sa’e Kareta Luxu: “Deputadu PN Rekonese Militante Haree Matan La Mos”

.

Jornal Nacional Diario - Tersa-Feira, 29 Janeiru 2013 

Reprezetante Povu iha uma fukun Parlamentu Nasional (PN) liu husi Prezidenti Komisaun G, Mateus de Jesus rekonese oras ne’e dadaun militante sira hateke deputadu sira hotu ho matan la moos, (odiu-red), tanba deputadu simu kareta luxu ho marka Prado. 

Tuir Mateus de Jesus, tanba odiu ne’e atu salva vida membru PN nian, maski laiha autorizasaun husi meza PN, deputadu hotu-hotu iha inisiativa rasik hodi halo reben ba kareta ne’ebe mak sira simu. 

“Meza Parlamentu Nasional la fo autorizasaun ba deputadu sira atu reben sira nia kareta, maibe deputadu sira nia inisiativa rasik hodi salva-an, razaun ba deputadu sira atu reben kareta ne’e tanba ema barak mak odiu kareta deputadu sira nia ne’e, tanba ne’e presiza reben atu nune’e bele salva deputadu sira nia vida,” dehan Prezidenti Komisaun G trata asuntu Etika ba deputadus iha PN foin lalais ne’e. 

Tuir deputadu husi Bancada CNRT ne’e mos afirma katak, Militante CNRT mos iha odiu malu, nune’e atu salva deputadu CNRT nia vida uniku solusaun maka hili reben kareta nia vidru halo metan tiha, atu nune’e bainhira deputadu sira halo fiskalizasaun iha baze bele sente seguru i livre husi ameasa vida. 

 Iha fatin hanesan, Deputadu husi bancada FRETILIN Inacio Moreira sujere, atu kareta membru PN nian labele tau reben, i rezeita informasaun ne’ebe hateten deputadu sira reben kareta tanba militante barak mak odiu membru PN relasiona ho sa’e kareta luxu ho marka prado. Inacio Moreira esplika, tuir loloos kareta estadu nian ne’e labele iha modifikasaun oi-oin. 

“La presiza tenke tau reben ba iha kareta estadu, reben ne’e hau konsidera hanesan modifika kareta atu jeitu liu fali, aat liu mak iha fali intensaun seluk, tanba ne’e mak hau hakarak hateten katak, diak liu kareta estadu nian labele tau reben,” Inacio Moreira sujere.

.