“Ro Kontijensia Naval Paradu”

.

Jornal Timor Post - Kinta-Feira, 31 Janeiru 2013 

Politika Sekretariu Estadu ba asuntu seguransa no Defeza, Julio Tomas Pinto iha Governasaun Aliansa Maioria Parlamentar (AMP) sosa ro rua husi China atu apoiu servisu kontijensia Naval, para konrola peska illegal iha tasi Timor, oras ne’e paradu tamba laiha fatin halo manutensaun. 

“Ro rua ne’e agora paradu deit iha Hera, maibe sira halo operasaun besik de’it iha kosta Norte nian,” Adjunto Diretor Fundasaun Mahein Joao Almeida ba Timor Post iha nia servisu fatin Balide Dili, Kuarta (31/1). 

Tuir Joao katak, iha 2010 ro rua ne’e konsege halo operasaun ba to’o kosta soul, no konsege kaptura peska illegal sira. “Ita seidauk iha portu ida ne’ebe lokaliza iha tasi teritoriu Timor Leste nian,” Joao hateten. 

Entertantu, iha uma fukun Parlamentu Nasional, komisaun B ne’ebe trata asuntu seguransa no Defeza husu ba SED Julio Tomas Pinto atu halo manutensaun ba ro rua ne’ebe paradu hela iha Portu Naval Hera. 

“Durante ne’e iha orsamentu jeral tinan-tinan ne’ebe aprezenta husi Ministeriu Defeza no seguransa, komisaun B nunka kua, ami husu aumenta tan, maibe husi governu hateten katak, ita nia kbiit orsamentu mak to’o hanesan ne’e ona, tan ne’e ami husu SED tenki halo manutensaun ba ro rua ne’ebe agora paradu hela,” Vice Prezidenti Komisaun B Duarte Nunes ba Timor Post iha PN, Kuarta (31/1). 

,