Projeitu Ponte Aitarak-Laran Abandona “CNT Tebe Sai Kompania Atramor”

.

Notisia Husi TVTL - Sesta-kalan, 25 Janeiru 2013 

Tamba kompania ATRAMOR ne’ebe nia nain mak Raul Lemos abandona Projeitu konstrusaun Ponte Aitarak-Laran, Consorsio Nasional Timor Leste (CNT) desidi hasai kompania ATRAMOR husi CNT, CNT promete Ponte ne’e sei finaliza iha fulan Abril ho kualidade ne’ebe diak. 

Consorsio Nasional Timor Leste (CNT) kompostu husi kompania 8, inklui kompania ATRAMOR ne’ebe hetan fiar hodi kaer obra ponte Aitarak-laran, maibe projeitu ponte ne’e abandona husi kompania ATRAMOR sai preokupasaun boot ba kapasidade kompania refere, ho responsablidade husi CNT atu labele lakon fiar husi Governu ba CNT liu husi kongresu extra-ordinariu, membru CNT hotu desidi hodi hasai kompania ATRAMOR husi organizasaun CNT. 

“Projeitu Aitarak-laran ne’e la’os kompania nian, maibe projeitu ne’e CNT nian mak intrega ba kompania ATRAMOR hanesan responsavel ba projeitu ne’e, maibe projeitu ne’e abandona hela, ne’e mak ami hol desizaun hodi hola fila fali projeitu Ponte Aitarak laran ne’e hodi finaliza projeitu refere,” dehan Prezidenti CNT. 

Hata’an kona ba projetu Aitarak-laran ne’ebe abandona, Nilton Gusmao ne’ebe hanesan Vice Prezidenti CNT hateten, projeitu ne’e entrega ona ba kompania Nilton Gusmao hodi finaliza projeitu Ponte Aitarak-laran iha fulan abril nia laran. 

“Ami desidi atu salva CNT iha ami nia ekipa nia liman, projeitu Ponte Aitarak laran ne’e ami sei hadia no ezekuta ho diak,” dehan Nilton. Preokupasaun CNT ba ponte ne’e tamba hanesan estrada publiku ne’ebe besik liu ba Palasiu PreZidenti sempre hetan kritika maka’as husi Xefe do Estadu, tamba halo movimentu transporte paradu iha tempu servisu.

.