“Taur Lakonkorda Politika Taka Estrada Kuak”

.

Jornal Timor Post - Segunda-Feira, 28 Janeiru 2013 

Prezidenti Republika, Taur Matan Ruak lakonkorda politika Governu ne’ebe taka estrada kuak iha Timor laran tomak tamba gasta osan demais tanba Prezidenti konsidera emprezariu sira hanoin de’it osan duke kualidade. 

“Hau hanesan Prezidenti triste tebes ba politika Governu ne’ebe mak loke kuak no taka kuak ba estrada sira iha Timor laran,” dehan Prezidenti Taur hafoin rona preokupasaun komunidade iha Distritu Oe-cusse kona-ba projeitu estrada ne’ebe kompania sira halo la iha kualidade. 

Tuir karta ne’e komunikadu ne’ebe diariu ne’e asesu, iha vizita servisu ne’e, xefe estadu enkoraza povu iha Distritu Oe-cusse atu kontinua kontrola no kritika bei-beik Governu no emprezariu sira ne’ebe halo obra laiha kualidade. 

Hanesan nain ba dezenvolvimentu, povu tenki iha aten brani nafatin hodi hateten sai, saida maka governu no emprezariu halo ladi’ak ka diak, ho preokupasaun husi komunidade sira sobre dezenvolvimentu ne’ebe halo seidauk diak ne’e, xefe estadu husu ba Governu no emprezariu sira atu kuida gasta osan arbiru. 

“Hau apela ba emprezariu sira atu labele hanoin de’it osan, maibe tenki hanoin obra ne’ebe atu halo hanesan ita nian rasik, gasta osan arbiru de’it, ida ne’e ita konsidera hanesan krime, tenki hapara ona hahalok ne’e, hahalok ne’e hanesan so’e masin iha tasi laran,” dehan Taur. 

Durante halo vizita servisu no dialogu ho komunidade iha Distrtu Oe-cusse, xefi estadu hetan keixa lubuk barak husi komunidade sira sobre projeitu estrada ne’ebe maka kompania lokal no nasional sira halo ho kualidade ladiak. 

Vizita servisu Prezidenti Republika iha Distritu Oe-cusse hanesan vizita ikus husi vizita servisu ne’ebe prezidenti halo ba distritu 13, tuir planu xefi estadu sei halo programa ida ne’ebe sei implementa iha futuru maka sei lao ba suku tomak atu rona diretamente povu sira nia preokupasaun.

.