“Eis Xefi Aprovizionamentu Ministeriu Justica Iha Governasaun AMP Simu Tinan 5 Kadeia”

,

Notisia Husi TVTL - Kuarta-feira, 23 Janeiru 2013

Kondenado Antonio Freitas la menta ho desizaun Tribunal Rekursu hodi hamonu sentensa tinan 5 kadeia ba nia, iha Kuarta Feira (23/01) semana ne’e kondenado Antonio Freitas tama ona iha prizaun Becora, Distritu Dili hodi kumpri desizaun Tribunal.

Lamentasaun ne’e hato’o husi kondenado Eis Aprovizionamentu Ministeriu da Justica Antonio Freitas, relasiona ho desizaun Tribunal hodi fo pena tinan 5 ba prizaun. Antonio Freitas hateten, nia la hatene nia sala mabe tribunal hamonu sentensa tinan lima kadeia ba nia, tamba ne’e nia konsidera desizaun Tribunal ne’e la justu.

“Iha ne’e hau solisita ba nain ulun sira atu haree halo didiak, hau atu mensiona uluk Tribunal ninia desizaun, iha primeiru instansia Tribunal Distrital Dili fo absolve ba hau katak, hau la hetan kondenasaun ba buat ida tamba evidensia laiha, ho nune’e nia absolve bah au, haruka hau bele fila tamba aboslvidu, mais to’o fali Tribunal Rekurus, iha Tribunal Rekursu hamonu fali sentensa ida ba hau, hau ne’e kondenadu boot liu fali arguida Lucia Lobato, hanesan hau mak Ministru iha Ministeriu Justica, hau hakerek surat ida liu husi ofisiu ida ne’e, hakarak informa ban ain ulun sira katak, prosesu hotu iha orgaun soberania nia liman laos iha xefi aprovizionamentu nia liman ou Prezidenti juri nia nia liman, ho nune’e, hakarak hateten katak tuir artigu 15 rejime juridiku aprovizionamentu entidades kompetensia mak Ministru no sekretariu estadu sira, ho nune’e hakarak hateten katak, atu hasai desizaun ruma tenki haree ba rezime juridiku aprovizionamentu ne’ebe vigor iha nasuan Timor Leste,” deklara Antonio Freitas.

Iha oportunidade ne’e, Familia boot Antonio Freitas mos kestiaona ho desizaun Tribunal hodi fo pena prijaun tinan 5.

“Buat hotu-hotu halo labele hanoin ba politiku, imi ne’ebe servisu iha Tribunal Rekursu tenki servisu loloos, serviso ba povu, laos servisu ba imi nia aan, tamba Antonio mak kondenada boot liu fali kondenada Lucia Lobato, se nasaun ne’e mak hanesan ne’e beibeik, oinsa mak nasaun ne’e bele ba oin” dehan familia Antonio.

Maske familia no kondenado lamenta ho desizaun Tribunal maibe Antonio Freitas oras ne’e dadaun tama ona prizaun Becora hodi kumpri desizaun Tribunal, fen no oan inklui familia akompania kondenada Antonio Freitas to’o komarka Becora, Dili.

.