Edifisiu MSS Nakfera: “La-Sama Husu Kompania Retensaun”

.

Jornal Timor Post - Kinta-Feira, 31 Janeiru 2013 

Vise Primeiru Ministru (PM) assuntu sosiais Fernando La sama de Araujo husu ba kompania Kamanasa Unipesoal ho PT sasamito husi Indonezia ne’ebe halo konstrusaun edifisiu foun Ministeriu Solidaridade Sosial (MSS) atu halo retensaun fila-fali ba edifisiu refere. 

“Hau nia hanoin konstrusaun edifisiu ne’e sei falta pursentu 10, para fo garantia ba situasaun sira akontese hanesan ne’e, ministru sira tenki fo hatensaun ba kompania ne’ebe uluk manan projetu konstrusaun ne’e, tenki retensaun fali tanba edifisiu ne’e, foin mak atu to’o tinan ida nakfera ona,” La-Sama ba Jornalista sira iha Hotel Timor, kuarta (30/1). 

La-Sama dehan, edifisiu foun ne’ebe halo seidaun to’o tinan ida nakfera fila fali, hanesan ne’e esperensia ba governu, planu ba oin atu fo projeitu ruma tenki fihir didiak. 

“Osan gastu boot ba edifisiu ne’e tenki kualidade, maibe se at fali hanesan ne’e, kompania ne’ebe halo projeitu ne’e la serve atu kaer obra estadu nian,” La-Sama la menta. 

Tanba ne’e, tuir La-Sama, iha Planu V Governu konstitusional ne’ebe lidera husi Primeiru Ministru Kay Rala Xanana Gusmao sei haree hela kompania ne’ebe halo obra laiha kualidade, ba prosimu labele fo tan projeitu. 

Entertantu, Direotr ADN Samuel Marcal hateten, edifisiu MSS ne’ebe nakfera ona, deskonfia kompania la tuir sistema ne’ebe diak, tanba ne’e husu sira reabilita fila fali ho sistema water profit (taka foun) fali sira ne’ebe nakfera. 

Nia hatutan, kestaun ida nakfera husi leten, ida ne’e tanba esfesifikasaun ne’ebe mak kontrator sira uza seidauk klaru, tanba ne’e, ADN koalia ona ho kontrator no MSS para atu fo solusaun ba konstrusaun atu bele hadia.

.