“Povu Hein Promesas Governu Tenki Sai Realidade”

.

Jornal Timor Post - Tersa-Feira, 29 Janeiru 2013 

Xefi Aldeia Lesu Domingos Corte Real hateten, promesa ne’ebe mak governu hato’o ba povu sira iha suku refere tenki said uni realidade, atu nune’e povu sir abele fiar nafatin Governu. 

“Promesa ne’ebe ita nia Governu promete hela ba komunidade sira mak hanesan, fornesementu bee-moos, estrada, eskola no promesa hirak ne’e halo komunidade sira iha suku refere sei hanoin hela no sira husu ba Governu tenke realiza duni atu nune’e povu bele hetan asesu ba infraestrutura baziku hirak ne’e ho diak,” dehan Domingos ba Timor Post iha Ainaro, segunda (28/1). 

Iha fatin hanesan, Moises de Araujo, komunidade Aldeia Lesu haktuir tan katak, Governu pelumenus tenke tau prioridade ba estrada no bee-moos inklui mos seluk tan, tanba estrada hanesan kestaun importante ida ba povu ki’ik sira atu hala’o atividade moris loro-loron no atividade ba eskola oan sira, liu liu iha tempu iklima udan. 

Nia husu ba Governu atu foti problema hanesan estrada, bee-moos no preokupasaun sira seluk ne’ebe mak komunidade sira infrenta iha area rurais. Aleinde ne’e, komunidade Aldeia Lebumera Danino Adao relsa tan, iha fatin ne’eba komunidade senti hanesan seidauk ukun an lolos tanba governu la tau atensaun iha fatin refere. 

 “Ami iha Aldeia Lebumera seidauk ukun an loloos, tanba dezde tempu Indonesia to’o ohin loron ami seidauk hetan asesu ba estrada, bee-moos no lina telekomunikasaun,” dehan nia. 

Ba problema hirak ne’e, sira husu ba Governu atu iha orsamentu jeral estadu (OJE) ba tinan 2013 bele tau mos prioridade ba sira nia Aldeia. 

.