“Lere Konvida Hercules”

.

Jornal Timor Post - Kuarta - Feira, 16 Janeiru 2013 

Major Jeneral FALINTIL-Forsa Defesa Timor-Leste (F-FDTL), Lere Anan Timur husu ba Rosario Marcal “Hercules” bele mai halo investimentu iha Timor Leste (TL), tanba Hercules mos nuudar Timor-oan ida. Maske nune’e, antes ne’e Lere rasik hasai esteitmentu atu kaer Hercules tanba tuir informasaun preman konesidu iha tanah Aban-Jakarta-Indonezia ne’e mai Timor-Leste lori ho Pistola. 

“Ne’e informasaun, informasaun ne’e balun loos, balun sala, hau dehan katak informasaun, se nia mai lori duni pistola ne’e sala ona, Hau jeneral de’it mos ba ema nia rain la lori Pistola dala rum abele lori Pistola boraxa ruma ema bele dehan Pistola,” Lere hateten ba konferensia imprensa ne’ebe halao iha edifisiu Kurtel Jeral F-FDTL, Fatuhada, Dili, tersa (15/01). 

“Hau rona naran Hercules, hau la konese se mak Hercules, maibe, nia Timor oan, hau konese jenerais barak ne’ebe uluk ami tiru malu, tanba saida mak hau bele hasiru Indoenzia sira, tanba sa mak hau la bele hasoru ita Timor-oan?,” nia hatutan. 

Hatan kona-ba esteitmentu antes nia rasik kestiaona maka’as atendementu espesial Polisia nian, wainhira Hercules to’o iha aeroportu, Lere rekonese, iha Timor-oan barak mak mentalidade ne’ebe atende ka simu ema emprezariu la hanesan ho ulun boot nasuan nian, nia dehan, ne’e akontese tamba Timor-oan barak presiza tebes osan, ne’ebe wainhira emprejariu ida tama mai Timor ho osan barak, Timor-oan sira simu diak tebes. Lere hateten, rajaun nia atu kaer Hercules, nia sei hein bainhira Hercules mai Timor mak nia bele koalia ba Hercules, nia dehan, bainhira Hercules mai ona, nia bele konese ona no tuir nia, karik Hercules mos influensia Timor-oan barak iha Indonezia, nia hein atu Hercules bele hasoru malu ho nia. 

 “Kaer ka la kaer, Hercules ne’e laos problema boot, iha nasaun hotu-hotu atu kaer ema ne’e, hatene kaer, importante mak Hercules nu’udar Timor oan mai ita koalia, la’os iha tiha dook ne’ebe mak ibun boboot, ne’e ita sees malu dook liu ona,” dehan nia. Iha oportunidade ne’e mos Lere hateten, problema nia ho Hercules ne’e la fo impaktu ba relasaun Timor Leste ho Indoenzia, katak, Lere afirma, problema ne’e interna tamba Hercules mos nuudar Timor oan ida. 

 “Funu maka halo ita fahe malu maibe sira konta ho ita, ita mos konta ho sira nu’udar Timor-oan, hau kontenti kuandu hau rona informasaun husi jenerais sira husi Indoenzia kona-ba Hercules, afinal ema Indoenzia mos preokupa ita nia maun alin sira ne’ebe sei hela iha Indoenzia, purque ita nia maun alin sira hanoin ema Indoenzia la preokupa ba sira nia moris, maibe lae,” dehan Lere. 

Entertantu Lere hateten, prosesu funu iha ema hanoin la hanesan, kompara ho funu iha Timor, hafoin liberdade iha ema balun ne’ebe uluk apoiu integrasaun mos oras ne’e barak mak servisu iha governu no instituisaun Estadu, tanba ne’e, nia husu atu Timor oan sira ne’ebe sei iha ema nia rain bele fila atu fo kontribuisaun diak liu tan ba dezenvolvimentu nasional. 

 “Labele hein situasaun ne’e diak liu mak foin mai, ne’e labele, mai ita hamutuk, ita hamutuk lori nasaun ne’e ba oin,” hateten nia. Lere hateten tan katak, Timor oan sira fila mai agora naton, jerasaun tuan sira sei iha tanba iha sira nia jerasaun hakarak eduka. 

Lere hateten, nia rasik preokupa tebes ho Timor-oan sira ne’ebe to’o oras ne’e sei hela iha ema nia rain, maibe nia hateten, tanba sa mak to’o oras ne’e sira seidauk fila hikas mai sira nia rai moris fatin, tanba ne’e, husu atu Timor oan sora ne’ebe hakarak fila odamatan nakloke, maibe tenki tuir normas no lei ne’ebe mak iha. 

“Bele mai deit, laos iha tiha Indonezia ne’eba maka koalia deit hakarak mai,” Lere afirma.

,