Hein Orden Governu: “F-FDTL Seidauk Halo Atuasaun Ba CPD-RDTL”

.

Jornal Timor Post - Kuarta - Feira, 16 Janeiru 2013 

Jeneral Lere Anan Timur deklara FALINTIL-Forsa Defesa Timor Leste (F-FDTL), seidauk simu desizaun husi Governu hodi halo atuasaun ba grupu CPD-RDTL ne’ebe okupa rai komunidade hodi halo Natar iha Suku Welaluhu, Sub-Distritu Fatuberliu, Distritu Manufahi. 

“Ami seidauk simu orden atu halo atuasaun ba grupu CPD-RDTL, ami simu ona orden mak ami ba atua ou kaer sira mais agora ami seidauk simu orden husi Governu,” Lere ba Jornalista sira iha Kuartel jeneral F-FDTL, Fatuhada, Tersa (15/01). 

Lere hateten, grupu ne’ebe organiza husi lider CPD-RDTL Antonio Ai-Tahan matak ne’e la estraga Timor, problema mak sira okupa fali komunidade sira nia rai iha fatuberliu depois sira dehan, ne’e rai estadu. 

 “Hau dehan ba sira, rai estadu iha Baucau, Losalos, Viqueque ne’eba, rai estadu laiha, ne’ebe ne’e rai estadu ema same nian, tanba ne’e mak ita fahe administrativamente, ema ida-idak tur iha ninia fatin, no sira (CPD-RDTL) tama iha ne’eba ne’e tuir dalan ka lae,” dehan Lere. Lere mos esplika katak, komandu F-FDTL iha Distritu manufahi laos tanba CPD-RDTL ka Ai-Tahan matak, maibe atu halao misaun forsa nian hodi familiariza forsa ho povu no terenu hanesan forsa ne’ebe komandu F-FDTL koloka iha uatulari, 

Viqueque, Atauro, Oecusse, Covalima no Bobonaro. Entertantu, antes ne’e, iha sede CPD-RDTL Balide Dili, kordenador CPD-RDTL, Antonio Ai-Tahan Matak deklara sei la fo ulun atu retira husi suku Welaluhu, sub Distritu fatuberliu, Distritu Manufahi, maske Primeiru Ministru Kay Rala Xanana Gusmao rasik hateten atu asai CPD-RDTL iha fatin refere. 

“Governu bele koalia tiha ona hanesan ne’e, sua exelencia Sr. Primeiru Ministru (Kay Rala xanana Gusmao), maibe ami nunka bele retira, ami nunka bele hanoin ita nia aman para koalia maibe, ne’e la’os area ida ke kona-ba atu sobu malu nian,” dehan Ai-Tahan Matak. 

.