“Kobransa Ilegal Ba veteranus Mosu Iha Maliana”

.

Jornal Independente - Kuarta-Feira, 27 Marsu 2013 

Pessoal funsionariu husi ekipa rejistu kombatentes no Martire libertasaun Nasional nian deskonfia halo kobransa illegal ba komunidade iha Distritu Bobonaro Sub Distritu Maliana. 

 Komunidade balun husi maliana, tersa horseik (26/3) hato’o keixa kestaun ne’e ba Parlamentu Nasional. 

Tuir komunidade Maliana Jose Barreto katak, sira preokupa boot tebes wainhira pessoal funsionariu balun halo rejistu ba martir veteranus ho selu U$100 dolar Amerikanu kada formulariu. 

 “Sira rejistu veteranus sira ne’ebe mate kada formulariu sira husu U$100 balun U$ 50, ida ne’e maka ami preokupa hela ne’e,” dehan nia hafoin hasoru malu ho deputadau sira iha PN (26/3). 

Iha prosesu rejistu, pesoal funsionariu ne’e esplika ba komunidade sira katak, osan hirak ne’e sira rekoile sei intrega ba xefe, maibe la esplika detaillu identidade xefi nian. 

Tanba ne’e, liu husi esplikasaun ne’e, nia (jose Barreto) rekoilla formulariu ne’ebe funsionariu sira uza hodi halo rejistrasaun ne’e lori mai iha PN. 

“Sira mos dehan baa mi katak, formulariu ne’e labele hatudu ba ema ida no imi hein de’it,” hatutan nia. Jose dehan tan katak, oras ne’e dadaun pessoal funsionariu ne’e rekoilla ona formulariu 10 resin no rejistu ona iha suku tolu mak hanesan, Ritabou, Raifun, ho La’o-Mea. 

“Ekipa funsionariu ne’e ema ida de’it maibe durante hau haree nia loke kantor servisu rejistu ne’e iha deit nia uma, mak ba halo rejistu, nia naran hau hatene,” salienta nia. Entertantu, deputadu Eladio Faculto husi bancada FRETILIN hato’o kestaun ne’e liu husi plenaria katak, funsionariu sira ba halo rejistu ba martires veteranus sira, halo kobransa ba komunidade husu fali osan U$100. 

“Tanba ne’e, rpoblema veteranus aban bain rua sai hanesan problema fukun iha Timor-Leste,” dehan nia iha Plenaria PN. Iha sorin seluk, deputadu Arao Noe hatete, se funsionariu ne’e mak halo duni kobransa illegal ba komunidade Maliana entaun ne’e komete krime. 

“Se iha duni kobransa ba martires veteranus sira, ne’e krimi, no halo mos husi funsionariu sira tan ou ajensia ne’ebe simu osan husi estadu tan no ba halo tan kobransa,” dehan nia. 

Tanba ne’e, nia husu atu komunidade ka deputadu ne’ebe iha dadus ne’e, be;e ba haro’o iha KAK atu bele investiga klean liu tan. “tenki halo keixa ba komisaun veteranus nian, halo mos ba KAK, tanba ne’e esplorasaun iha area korupsaun,” haktuir Arao. 

.