“PN Sei Buka Abut Asesor Ezekuta Osan Estadu”

.

Jornal Timor Post - Segunda, 18 Marsu 2013 

Parlamentu Nasional (PN) liu husi Komisaun C hodi buka abut asesor ne’ebe sai fali ezekutador ba Orsamentu Jeral Estadu (OJE) ne’ebe hetan aprovasaun husi PN. 

Tuir informasaun ne’ebe iha durante ne’e, seidauk iha serteza ne’ebe los katak iha asesor ne’ebe ezekuta orsamentu ne’ebe aprova, tanba tuir lei jestaun finanseiru asesor laiha poder atu ejekuta osan, maibe Ministeriu mak ejekuta osan tuir planu Ministeriu maka bele ezekuta osan tuir planu ne’ebe iha. 

 Vice Prezidenti Komisaun C, Igilda Soares, hatete, iha ona informasaun ne’ebe komisaun rasik simu, maibe seidauk iha identifikasaun ba asesor ne’ebe ezekuta osan ne’ebe aprova husi PN. 

“Ami rona no buka hela, maibe ami rona de’it ami labele dehan los, agora ami buka tuir, tanba ita iha mekanizmu atu bele buka ida ne’ebe mak los no sala,” hateten Igilda Soares ba jornalista iha PN, Sesta (15/3). 

Tuir nia, komisaun C rasik rona hela informasaun, maibe seidauk iha provas katak asesor iha Ministeriu balu ezekuta fali osan. “Agora ami sei buka tuir, tanba asesor ida mai iha ne’e atu bele fo pareser juridiku laos atu komanda fali ita nia osan,” dehan Vice Prezidenti Komisaun C ne’e. 

Tuir nia,” Ida ne’e labele akontese, tanba ita mak iha direitu atu bele ezekuta ita nia osan rasik no ema seluk labele mai hanesan asesor labele ezekuta, maibe nia fo deit pareser,” dehan Igilda. 

,