Dr. Mari Alkatiri “FRETILIN Prontu Koopera Ho Governu”

.

Jornal Independente - Sesta-Feira, 22 Marsu 2013 

Sekretariu Jeral Partidu FRETILIN Dr. Mari Alkatiri hatete, FRETILIN sei la halo parte iha Governu koligasaun maibe pronto nafatin atu koopera ho governu hodi hamenus kiak iha Timor-Leste. 

“FRETILIN sei la tama iha Governu, se FRETILIN tama iha Governu, se mak atu halo opozisaun, opozisaun atu fo kontribuisaun para atu hatuun hamenus kiak iha rai laran ne’e,” dehan Alkatiri iha Hotel Timor orsehik. Alkatiri dehan, FRETILIN koopera bainhira Primeiru Ministru Xanana Gusmao fo knaar ruma atu servisu. 

“FRETILIN pronto koopera hanesan knaar ne’ebe hau simu, maibe hau kritika nafatin kuandu buat ruma lalos,” dehan Alkatiri. Ezemplu, Alkatiri dehan, Primeiru Ministru Xanana Gusmao ho PR Taur Matan Ruak fo fiar ba nia sai negosiador ba jona ekonomia esklusivu iha Oecusse. 

 Maibe, Alkatiri dehan, nia sei hakilar nafatin bainhira governu servisu lalos. 

“Kuandu ezekusaun (OJE) 2013 ne’ebe mak aprova ho unimidade ne’e lalos hau tenki hakilar nafatin, hau ba koalia ho Primeiru Ministru (Xanana), hau sei hakilar iha nia tilun, ne’e mak hau halo,” dehan Alkatiri. 

Kona ba kinerza serviso governu durante ne’e, lider opozisaun ne’e dehan, diak liu PM xanana halo remodelasaun hodi redus tiha estrutura governu ne’ebe boot. 

“Ba hau, pelumenus estrutura membru agora hasai trinta kadeiras hanesan ne’e,” dehan Alkatiri.

.