“KAK Fo Ultimatu Ba Borlaco”

.

Jornal Independente - Segunda-feira, 25 Marsu 2013 

Komisaun Anti Korupsaun (KAK) fo ultimatu dias ba atual Sekretariu Estadu Fortalesementu Institusional (SEFI) Francisco Borlaco atu tuir prosesu investigasaun ba kazu krime ho tipu abuzu de poder no fraud fiskal. 

Tuir fontes konfirmadu husi KAK katak, segund aohin (25/3) mak loron ikus ba Borlaco no wainhira la kumpri karta notifikasaun, tersa (26/3) KAK koopera ho Polisia Nasional Timor Leste (PNTL) sei ba kaer obrigatoriu (dijemput paksa). 

Tuir fontes anonimu ne’e katak, Borlaco la kumpri karta notifikasaun ba dala rua ona ho rajaun oioin. Karta ne’e haruka direta ba Borlaco atu bele tuir prosesu investigasaun tuir akuzasaun Ministeriu Publiku (MP) nian ne’ebe deskonfia nia involve kazu krime relasaun ho prosesu tenderizasaun iha aprovizionamentu nasional, bainhira nia sei lori kargu nu’udar Diretor jeral Aprovizionamentu Ministeriu Finansas iha IV Governu Konstitusional. 

 Nia dehan, KAK tenki ba obriga Borlaco atu tuir investigasaun, tanba loron sesta liu KAK atu halao investigasaun ba nia iha oras tuku 10:00 dader, maibe nia parte hamate nia numeru telefone. Parte investigador KAK tenta konfirma fali ba numeru ofisial Governu nia ativu hela, no Borlaco liu husi via telefone husu deskulpa ba investigador KAK hodi la marka prezensa tanba halao hela inkontru ho Ministeriu Edukasaun, Bendito Freitas no funsionariu sira. 

 “Hau husu deskulpa tanba hau hala’o hela enkontru ho Ministeriu Edukasaun,” haktuir fontes konfirmadu KAK hodi informa ba jornalista sira ne’ebe antes ne’e mos hein hela SEFI Borlaco iha edifisiu KAK. 

Tuir fontes ne’e katak, asaun SEFI Borlaco ne’e la konsidera KAK ba luta kontra korupsaun iha rai ne’e. 

Nune’e, antes ne’e, SEFI Borlaco informa katak, nia parte pronto deklara lia loos ba tribunal, bainhira hetan karta ruma hodi justifika kazu ne’ebe akuza ba nia. 

 “Hau sei fo resposta ba akuzasaun Ministeriu Publiku iha Tribunal, kuandu hau hetan ona notifikasaun, tanba Tribunal mak fatin ita atu fo lia los,” informa Borlaco foin lalais ne’e. 

Borlaco mos rekonese iha tinan 2009, nia parte mak haree prosesu tenderizasaun hotu ne’ebe sentralija iha Ministeriu Finansas no buat hotu ne’ebe nia halo prosesu tuir lei. 

“Akuzasaun ne’e normal, e sei la impede hau nia servisu, hau hakarak informa ba publiku katak, kuandu ita hakarak kaer ukun tenki iha risku, dala ruma ita nia desizaun hakarak halo mudansa iha ema barak simu no barak mos la simu, entaun ema ne’ebe la simu desidi lori ba Ministeriu Publiku ne’e normal,” dehan nia.

.