Konfundi Liberalizasaun Telekomunikasaun “PN Eziji Pedro Lay Esplika Ba Publiku”

,

Jornal Nacional Diario - Kuarta-Feira, 20 Marsu 2013 

Reprejetante povu iha Parlamentu Nasional (PN) husi Bancada FRETILIN no CNRT eziji ba Ministeriu Transporte no Telekomunikasaun (MTK), Pedro Lay, atu esplika ba publiku kona ba liberalizasaun telekomunikasaun no funsaun autoridade regulador telekomunikasaun ne’ebe governu kria, nune’e ema hotu bele hatene. 

 “Hau husu ba MTk Pedro Lay atu mai esplika iha Parlamentu ne’e kona ba liberalizasaun ne’e la’o halo nusa? Autoridade regulador ne’e harii ona ka seidauk? No atu kontrola ne’e halo nusa? Para ita la bele espekula buat bar-barak iha Parlamentu ne’e,” hateten deputadu FRETILIN, Estanislau da Silva liu husi intervensaun ba plenaria, Tersa (19/3). 

Deputadi III legislatura ne’e mos akresenta, la’os deit kona ba problema liberalizasaun telekomunikasaun, maibe Ro Nakroma, tinan-tinan tenki halo manutensaun, maibe realidade la halao tanba oras ne’e dadauk Ro Nakroma kondisaun sei aat hela. 

 Iha fatin hanesan, deputadu Bancada CNRT, Pedro Martires, aseita katak, Ministru Pedro Lay tenki mai iha Parlamentu Nasional hodi esplika ba publiku kona ba liberalizasaun no autoridade reguladora. 

“Ministru Pedro Lay tenki mai iha PN hodi esplika kona ba preokupasaun kliente nian, relasiona ho prezensa operador rua, (Telekocel no Timor Telekom-red) ne’ebe opera iha ita nia rai, tanba operador rua ne’e agora dadaun labele komunika ba malu,” hateten Pedro Martires. 

Hakarak ka lakohi, Pedro dehan, Ministru Pedro Lay tenki esplika duni kestaun Telekomunikasaun nian ba publiku atraves PN atu nune’e kliente husi operador rua ne’e bele hela ho klareza. 

,