Sala Utiliza Osan Estadu “Eis Diretor No Eis Jornalista Sai Arguidu”

.

Jornal Timor Post - Kinta-Feira, 21 Marsu 2013 

Eis Diretor Nasional Meiu Ambiental husi Sekretariu Estadu Meiu Ambiente iha IV Governu, Carlos Lopes Ximenes no eis Jornalista Televizaun Timor Leste (TVTL) Pascoela dos santos sai arguidu tanba utuliza sala osan estadu.

 Liu husi akuzasaun Ministeriu Publiku katak, iha loron 10 Janeiru 2011 arguidu Carlos Ximenes lori resibu mamuk ba fo arguida Pascoela dos santos hanesan produtora TVTL atu asina, hodi selu osan ba programa pakote meiu ambiente nian. 

Maibe tanba arguida okupadu los asina duni resivu refere hodi husu ba eis diretor ne’e atu tau loloos osan ba pakote produsaun ho montante U$2,000,00, maibe hafoin asina arguidu Carlos hakerek fali montante orsamentu ho montante U$3.500,00 no haruka tezoru sekretariu meiu ambiente atu asina hodi foti osan ho montante refere ba arguidu Pascoela para halo produsaun ba programa ba meiu ambiente nian. 

Realidade hatudu arguidu Carlos fo de’it osan montante U$ 2,000,00 ba arguida Pascoela no restu arguidu Carlos uza ba interese privadu, ho hahalok refere, Ministeriu Publiku akuza arguidu ho krime abuzu de poder. 

Iha esplikasaun lei kodigu penal ba abuzu de poder artigu 297 esplika, funsionariu ne’ebe abuzu poder ba viola obrigasaun, ne’ebe mai husi funsaun ne’ebe nia ka’er, atu hetan benefisiu ba nia ka ba ema seluk ka hamosu prejuizu ba ema-seluk sei hetan pena prizaun tinan 1 too tinan 4, kuandu dispozisaun legal seluk la haruka aplika pena todan liu. 

Entertantu, arguidu Carlos liu husi nia deklarasaun ba Tribunal hatete, komunika duni arguida pascoela atu halo produsaun ba pakote meiu ambiente nian, tan ne’e nia intrega osan U$2,000,00 ba arguida no restu husi osan ne’e ho total U$1.500,00 uza ba atividade Wrok Shop sira nian. 

Nune’e mos Carlos rekonese, maske atividade pakote seidauk lao maibe nia ho sekretariu Claudio halo ona relatoriu, restu husi orsamentu hirak ne’e tau hotu iha banku. 

Entertantu, arguida Pascoela dos Santos liu husi nia deklarasaun ba Tribunal hateten nia simu duni osan ho valor $2,000,00 laos ho valor $3500,00 ne’ebe mensiona iha resibu. 

Nia rekonese iha altura ne’eba nia simu resibu mamuk tanba atrapalu liu mak nia asina, maibe kontinua husu ba arguido Carlos tau loloos montante orsamentu ne’ebe nia simu. 

Alende ne’e, mos nia husu ba arguido Carlos atu parezenta referensia foun, tanba nia la dun iha konesementu ba titulu pakote ne’ebe arguidu Carlos fob a nia, maibe nia hein kuaze fulan ida arguidu la aprezenta referensia to’o inspensaun jeral tun ba halo inspensaun. 

 Nia mos deklara katak, osan ne’ebe nia simu aloka U$660,00 ba nia kolega nain rua, Julio Lopes ho Jose Antonio kada ema ida simu U$330,00 hodi prepara karik arguidu Carlos Telefone, maibe derepenti sira nain rua tenki dezloka kedas ba distritu hodi foti filmazen foun, maibe tanba programa pakote seidauk realiza no investigasaun la’o dadauk mak arguido kontaktu nia kolega nain rua atu intrega hikas osan ne’ebe nia sumu husi arguidu Carlos ba Ministeriu Publiku. 

Audensia julgamentu ne’e lidera husi Juiz koletivu Duarte Tilman, Julio Gantes, Jose Maria de Araujo, Ministeriu Publiku reprejenta husi prokuradora Angelina Saldanha no arguidu nain rua hetan defeza husi advogado Arlindo sances no advogadu internasional ida.

,