“Advogadu Internasional Konsidera Administrasaun Fiskal TL Fraku”

.

Jornal Independente - Kuarta-Feira, 20 Marsu 2013 

Kompania Internasional Tokyo Timor Sea Resource PTY Ltd (explorador MiGas Tasi Timor) konsidera Timoroan sira seidauk iha konesementu klean kona ba serviso administrasaun fiskal. 

Advogado kompania Tokyo Timor Sea Resource PTY Ltd, Rui Boutica Santo deklara ida ne’e iha segundu julgamentu ba kazu prosesu taxa explorasaun mina no gas iha Tasi Timor, iha Tribunal Distrital Dili, Tersa (19/3). 

Tuir nia, prosesu selu taxa sai problema tanba administrasaun fiscal iha Timor Leste mak fraku, nia dehan Timoroan la hatene identifika diak prosesu selu taxa ne’e. 

Advogadu konfesa dehan, durante ne’e kompania sira selu duni taxa bazeia ba akordu ne’ebe iha nomos konsidera area JPDA la’os pertense ba Timor Leste, maibe nu’udar area konjuntu kona ba explorasaun mina no gas entre Australia no Timor Leste. 

Nune’e, nia husu ba Tribunal atu foti desizaun tuir preokupasaun kompania sira nian. Tuir tstamunha kompania explorasaun MiGas, auditor da Ernst, Young Parther, Robert Alexandre Kirkby deklara ba Tribunal katak, nia rasik laiha konesementu kona ba prosesu selu taxa kona ba explorasaun mina no Gas iha tasi Timor. 

 Nia lahatene tinan barak nia laran selu taxa ba Australia ka ba Governu Timor Leste. Testamunha Robert dehan, bazeia ba rejultadu auditoria iha tinan 2005, kompania explorador sira gasta osan kuaze miliaun U$1541, iha tinan 2006 kompania sira hasai gastus kuaze mialuan U$15,541, tama fali ba tinan 2007 sira hasai gastu kuaze miliaun U$9004, iha tinan 2008 sira gasta osan kuaze milaun U$14,000, iha tinan 2009 gasta despezas kuaze U$7,776 no ikus liu iha tinan 2010 gasta despezas kuaze miliaun U$2,245. 

 Ekipa ne’ebe reprezenta komapnia Tokyo Timor Sea Resource PTY Ltd iha Tribunal Dili kompostu husi ema nain rua, Rui Boutica Santos no Luis Moreira Cortes, entertantu husi parte governu Timor Leste reprezenta husi defeza estranjeiru ema nain tolu hanesan, Patrick Benedet, Patricia Godinha Silva inklui Frederico Fereira. 

Entertantu, Ministeriu Publiku reprezenta husi Prokurador Gloria Alves defende Timor Leste katak, saida mak ahto’o husi advogadu kompania sira nian laiha evidensia forte tanba nunka halo tuir saida mak governu Timor Leste haruka. 

 Iha parte seluk, advogadu Governu Timor Leste, Patrick Benedet hatete durante tinan barak nia laran governu Timor Leste sempre haruka karta norifikasaun ba kompania sira hodi kompri sira nia dever kona ba investimentu ne’ebe sira hala’o iha tasi Timor, maibe nunka kumpri.

 Iha momentu ne’eba, governu mos husu atu estabelese sira nia edifisiu iha Timor Leste, maibe nunka iha resposta pozitivu husi kompania sira. Advogadu ne’e konsidera, kompania explorasaun mina no gas iha Tasi Timor nu’udar sira nia investimentu, tanba ne’e tenki kumpri tuir rekijitu governu Timor Leste nian. 

Ho deklarasaun hirak ne’e, Tribunal desidi hodi fo sai leitura resposta ba material faktus iha loron 16 fulan maiu oin.

,