“Borlaco ‘Diskuti Malu’ Ho Investigador CAC”

.

Jornal Nasional Diario - Kuarta-Feira, 27 Marsu 2013 

Sectretariu Estadu Fortelesimentu Institusional (SEFI), Francisco da Costa Soares “Borlaco”, Tersa (26/3), kumpri ona notifikasaun Comisaun Anti Corupsaun (CAC) nian hodi ba presta deklarasaun kona ba kazu maladministrasaun, abuzu poder ho korupsaun ne’ebe akontese iha Ministeriu Finansas durante mandatu Governu Aliansa Maioria Parlamentar (AMP) nian (2007-2012). 

Antes ne’e, CAC bolu Francisco Borlaco, dala rua, maibe Borlaco la marka prezensa iha CAC, “ameasa” sei halo kapturasaun obrigatoriu ba Francisco Borlaco, wainhira la responde tan notifikasaun CAC nian bad ala tolu ne’e, horseik. Francisco Borlaco to’o iha Edifisiu CAC iha farol, Tuku 10:00 OTL ho kareta Estado nian marka PRADO ho numeru Polisia 00033G no submete ba investigasaun durante oras tolu nia laran (Tuku 10 to’o tuku 13:00 OTL). 

Iha investigasaun ne’e, investigador CAC nian fo pergunta barak ba Francisco Borlaco, hodi halo nia “ran nakali” no fila ‘deskute malu’ ho investigador sira. 

Hafoin presta tiha deklarasaun iha CAC, Framcisco Borlaco hanesan mos lideransa ida iha Partidu Demokratiku (PD), informa ba jornalista sira katak, CAC notifika nia hodi submete ba investigasaun ne’e relasiona ho kazu lubuk ida ne’ebe akontese iha Aprovizionamentu Ministeriu Finansas nian iha IV Governu Konstitusional. 

 “Iha investigasaun ne’e, pregunta husi investigador sira barak tebes mai hau no hanesan sidadaun hau respeita instituisaun ida-ida, tanba ne’e hau tenke hata’an hotu perguntas sira ne’e,” informa Francisco Borlaco. 

Francisco Borlaco esklarese liu tan, durante ne’e la’os CAC deit mak notifika no bolu nia, maibe Parlamentu Nasional, PDHJ, PNTL, Inspektur Jeral no Ministeriu Publiku mos balun beibeik ona, tanba iha IV Governu konstitusional nia mak kaer hotu sentru Detensaun ba Aprovizionamentu no Sistema Finansas Sentralistiku Estado tomak. 

 “Los duni, iha hau nia desizaun iha buat barak diak no buat barak mak ladiak, buat barak diak mak ohin loron osan iha distritu 13, iha Suku-suku no aldeia tomak no iha Ministeriu hotu, ema hotu hatene CVP, PO no hatene osan uluk ema lahatene buat sira ne’e, uluk ema sa’e biskleta no motor, agora ema sa’e Hamer ho Prado deit no halo uma mesak didiak deit,” Borlaco afirma hikas. 

Tuir Borlaco, buat at mak ema barak lori nia ba hata’an iha fati-fatin, iha CAC iha Ministeriu Publiku no ikus mai iha Tribunal, maibe hanesan ema ne’ebe ka’er ukun tenke responsabliza ba nia ukun, tanba nia foti desizaun relasiona ho osan, katak iha ema balun gosta iha ema balun la gosta. 

Borlaco pronto atu ba hata’an iha Tribunal bainhira prosesu ne’e CAC lori ba to’o iha Tribunal, tanba sidadaun hotu iha Timor Leste moris iha lei nia okos.

,