“Povu Hamlaha, PN Fo Kulpa Ba MAP”

.

MARIANO ASU NAMI

Jornal Nasional Diario - Kuarta-Feira, 27 Marsu 2013 

Parlamentu Nasional (PN) fo kulpa ba Ministeriu Agrikultura no Peskas (MAP), tanba durante tinan lima nia laran MAP gasta osan barak hodi hola traktor atu halo toos ho natar ba povu, maibe iha realidade povu kontinua enfrenta hamlaha. 

Tuir Xefi Bancada FRETILIN Aniceto Guterres, situasaun Kosta sul, Parte Suai, Covalima nian ema balun komesa hamlaha, tanba bain loron naruk. 

“Hau preokupa tebe-tebes tanba ida ne’e akontese iha kosta sul, area ne’ebe ita espera katak, ida ne’e bele sai Zona ida, bele fo han ba Timor latan tomak, tanba ne’e governu desde tinan 2007 halo investimentu boot tebe-tebes, governu ida ne’ebe to’o ohin loron mos Ministru ida ne’e sei kontinua nafatin kaer Ministeriu ne’e,” afirma Aniceto Guterres iha plenaria Parlamentu Nasional, Tersa (26/3). 

Nia hatutan, tratores barak ne’ebe MAP hola iha tinan lima liu ba, maibe la fo rejultadu pozitivu ida ba populasaun ida ne’e. Aniceto mos la fiar ho slogan ne’ebe MAP Mariano sabino fo sai katak, Ministeriu ne’ebe nia kaer halo ona produsaun barak, no produsaun sira ne’e kada tinan aumenta. 

“Hau duvida tiha ona kuandu uluk nia mai iha Parlamentu, iha parte ida kuandu nia dehan produsaun kada tinan aumenta to’o 90 mil toneladas, maibe importasaun fos mai beibeik mai husi rai liur, ne’e ita duvida tiha ona,” dehan Aniceto. 

 Ba kestaun ne’e, Primeiru Vice Prezidenti parlamentu Nasional, Adriano do Nascimento hateten katak, Governu tenki haree didiak situasuan seriu ida ne’e para rezolve. Nia parte mos husu ba komisaun D Parlamentu Nasional ne’ebe trata asuntu agrikultura atu tun ba terenu hodi haree no rona rasik preokupasaun povu nian atu nune’e Governu bele halo asaun ruma. 

 “Hau husu ba komisaun kompotente atu haree problema ida ne’e hodi tau iha planu ba futuru,” tenik nia. 

.