“PR Taur Bolu Atensaun Ba Governu”

.

Jornal Nacional Diario - Kuarta-Feira, 20 Marsu 2013 

Prezidenti da Republika (PR) Taur Matan Ruak bolu atensaun ba V Governu konstitusional atu ezekuta Orsamentu Jeral do Estado (OJE) ho Responsablidade. Xefi Estadu Taur Matan Ruak promulga OJE 2013 iha loron 01 de marsu tinan 2013, hafoin Parlamentu Nasional aprova iha 18 Fevereiru 2013. 

Iha promulgasaun ne’e, Prezidenti anexa mos notas jeral balun ne’ebe ejiji ba Governu atu kumpri ho responsablidade kona ba ezekusaun orsamentu ne’e. 

Apela Prezidenti da Republika ne’e importante hodi evita iregularidade iha ezekusaun orsamentu ne’e, nune’e orsamentu 2013 nian bele hetan problema povu nian. 

 “JSMP hanoin katak, orsamentu ne’ebe boot maibe ho nia alvu no prioridade ne’ebe la realistiku bele fo fatin ba risku no iregularidade iha nia implementasaun tanba ita nia sistema kontrolu ne’ebe seidauk metin, tanba ne’e, Prezidenti la veta orsamentu ne’e, JSMP enkoraza prezidenti atu uza nia kapasidade hanesan xefe Estadu atu kontrola ezekusaun orsamentu ne’e hodi benefisia interese povu nian,” informa Diretor JSMP, Luis de Oliviera Sampaio liu husi nota komunikadu imprensa ne’ebe redasaun JNDiario hetan asesu iha Tersa (19/3). 

Iha Xefi Estadu Taur nia notasaun, bolu atensaun ba governu atu bele ezekuta OJE 2013, bad uni perioridade sira, la’os ho optimismu de’it atu halo projeitu boot, maibe nunka realiza. Prezidenti refere, ezemplu iha ezekusaun OJE 2012 iha infraestrutura so bele atinji de’it 29%. 

Prezidenti mos preokupa konaba inflasaun ne’ebe kontinua afeta maka’as ba nasaun durante tinan rua kotuk inklui ba aktus peskas ilegais sira ne’ebe prezudika estadu Timor Leste lakon osan mialuan U$20 kada tinan. 

Parte seluk, Prezidenti Taur Matan Ruak, lamenta mos kona-ba estrutura ba gastus iha orsamentu 2013, ne’ebe nia alokasaun orsamentu ki’ik liu iha area prinsipal sira hanesan edukasaun hetan deit 5,6%, saude 3,7% no ba setor agrikultura hetan deit 1,5% ho maioria populasaun 80% moris vida agrikultura. 

Ho nune’e, Prezidenti husu ba Governu atu justifika ba publiku kona ba projeitu Tasi Mane iha Costa Soul ne’ebe gasta osan barak no kontrariu ho alokasaun ba area dezenvolvimentu humanu.

,