“PN Husu Suspende Borlaco Husi Kargu”

.

Jornal Nacional Diario - Segunda, 18 Marsu 2013 

Parlamentu Nasional (PN) husu ba Governu Konstitusional dalima, ne’ebe lidera husi Primeiru Ministru Kay Rala Xanana Gusmao, atu suspende tiha Sekretariu Estadu Fortalesementu Institusional, Francisco Borlaco husi funsaun, atu nune’e nia bele prepara an hodi tuir julgamentu relasiona kazu ne’ebe nia abuzu poder bainhira sei assume kargu nudar Diretor Jeral Ministerio Finansas iha IV Governu Konstitusional. 

Tuir Deputadu Estanislau da Silva husi bancada FRETILIN, katak, kazu ida ne’e depende ba governu nia desizaun, liu-liu Primeiru Ministru, maibe diak liu tenke suspende Francisco Borlaco husi nia funsaun. 

“Ba hau, para transperensia liu, diak liu suspende tiha nia funsaun, nia funsaun ne’e ema seluk bele akmula hala’o hela, maibe nia tenki prepara nia aan para ba hatan iha Tribunal,” dehan Estanislau da Silva ba JNDiario, Sabadu (16/3) iha Parlamentu Nasional. 

Nia hatutan, hanesan reprezetante povu nia mos konkorda katak, ema ne’ebe akuzadu tenki ba hatan duni iha Tribunal para justifika saida maka nia halo no saida mak nia la halo, atu nune’e povu bele hatene klaru. 

“Iha rai balun kuandu ema akuzadu ka halo ona sala hanesan ne’e, governu suspende sira nia funsaun, suspende la’os atu hasai nia, maibe suspende para nia prepara aan hodi ba hata’an iha Tribunal,” tenik Estanislau. 

Nia haktuir, bainhira Tribunal desidi katak nia la sala, nia bele fila fali hodi assume fali nia funsaun. Ba kestaun ne’e, Deputadu Ara’o No’e husi bancada CNRT hateten katak, iha akuzasaun ba Francisco Borlaco, nia hanesan sidadaun ida, tanba ne’e, se kazu ne’e tama ona iha Tribunal, nia tenki submete ba justisa. 

Arao Noe, dehan, kona ba nia pozisaun hanesan membru governu, kuandu besik ona atu tama ba julgamentu, Tribunal sei haruka karta mai Parlamentu Nasional atu bele foti nia imunidade. 

“Imunidade ne’e iha rua, hanesan foti imunidade atu nia submete ba justisa deit, ou foti nia imunidade total durante prosesu ne’e la’o,” dehan Arao.

,