Julgamentu Kazu ConocoPhilips “Relatoriu La-Loos Estadu Hasai Liquidasaun”

,

Jornal Timor Post - Tersa-Feira, 19 Marsu 2013 

Tribunal Distrital Dili (TDD), Segunda (18/3), hahu halo audensia julgamentu ba kazu ConocoPhilips hasoru estadu ne’ebe rejistu ho numeru prosesu 39/sivil/2012/TDD, hodi rona sasin Monica Rangel hanesan reu (estadu Timor Leste) rekonese kompania hatama relatoriu rendementu annual la-loos maka estadu desidi hasai liquidasaun ba kompania. 

Monica Rangel da Cruz ne’ebe assume kna’ar hanesan Diretora Nasional Reseitas Ministeriu Finansas liu husi nia deklarasaun ba Tribunal hateten, problema ne’ebe akontese entre kompania esplorasaun iha tasi Timor akontese 2009. Tan ne’e, estadu TL tenta kontaktu kompania esplorasaun mina hotu atu kria inkontru hodi husu mos ba kompania sira atu aprezenta relatoriu rendimentu annual ba estadu TL, maibe, kompania hirak ne’e kontinua la kumpri regras estadu TL hodi hato’o de’it relatoriu ne’ebe la kompletu. 

Nia hatutan, entaun iha loron 16 fulna-Junu 2010 estadu TL hasai karta hodi husu ba kontribuintes (Kompania esplorasaun mina-red) atu prepara eskritoriu no tau dokumentus iha TL presiza buat ruma fasil atu buka tuir kompania sira iha servisu fatin. Maibe, regra hirak ne’e hotu kompania sira kontinua la kumpri, maka iha setembru 2011 estadu haruka notifikasaun ba kompania sira, iha loron 13 Dezembru 2012 estadu hasai nota liquidasaun ba kompania sira. 

Testamunha Monica mos lamenta kompania esplorasaun mina iha Tasi Timor hato’o relatoriu rendimentu annual tuir lina 66 sobre total rendimentus ne’ebe kompania sira hetan, tanba relatoriu ne’ebe kompania aprezenta sei liu husi prosesu auditoria iha Timor Leste. 

Audensia julgamentu ne’e lidera husi juiz koletivu Paulo Teixeira, Ana Paula Fonseca, Antonio Helder da carmo, Estadu Timor Leste hetan apoiu husi Prokurador internasional Gloria Alves no advogado internasional Patrieck Benedet, Patricio Godinho Silva no Fredirico Fereira. 

Alende ne’e, parte kompania ConocoPhilips ho nia parseria Tokyo Timor Sea hetan defeza husi advogadu Internasional Rui Botika Santos no Luis Moreira Cortes.

.