Futuru Komisariu “Longuinhos, Afonso, Mateus Ou Hornai?”

.

Jornal Timor Post - Kinta-Feira, 14 Marsu 2013 

Mandatu Longuinhos Monteiro iha Instituisaun Polisia Nasional Timor Leste (PNTL) hanesan Komisariu, nia rohan maka fulan-Marsu tinan ne’e. 

Tuir informasaun ne’ebe diariu ne’e hetan, figura atu troka Monteiro iha instituisaun PNTL maka Superintendente Xefi Afonso de Jesus atual segundu komandante, Henrique da Costa atual komandante administrasaun, Mateus Fernandes (dadaun ne’e kontinua hela estudu iha Jakarta-Indonesia), Heremengildo Pereira atual komandante Distritu Bobonaro no Julio Hornai atual Diretor inspetor jeral.

Lei organiku PNTL artigu 13, konsellu superior kompostu husi komandante jeral, segundu komandante jeral, Inspetor jeral, komandante operasaun, komandante administrasaun, komandante unidade espesial polisia, komandante unidade maritime, komandante unidade patroliamentu Fronteira, Xefi Serviso informasaun polisia, xefi serviso investigasaun polisia nian, komandante sentru formasaun polisia no komandante Distritu sira. 

Ho mandatu ne’ebe atu remata iha 27 Marsu semana rua oin mai, Longuinhos Monteiro hatete, komisariu hanesan fatin ne’ebe importante tebes. 

 “Karik iha dia 27 maka laiha ema foun, hau nafatin ezerse hau nia funsaun hodi hein komandante foun ida maka troka, haul abele husik fatin ida ne’e mamuk, fatin ne’e importante tebes, presiza komandante ida ne’ebe hola desizaun ba orgaun ida ne’e, ne’e ita labele husik mamuk,” Longuinhos ba Timor Post iha nia servisu fatin, Kuartel Jeral PNTL, Caicoli, Dili, Kuarta (13/3). 

Kona ba ninia mandatu, nia dehan, ne’e desizaun governu,” Desizaun hotu-hotu fila-fali ba governu, governu kuandu rona opiniaun husi konsellu superior polisia ho intensaun para atu hola desizaun ruma, ne’e bele de’it, ne’e governu maka manda, governu maka hasai rezolusaun, kestaun Birokrasia hau hanoin laiha, depende agora ne’e desizaun politika, la’os desizaun hau nian,” Longuinhos hatutan. Iha oportunidade ne’e nia hatutan, karik nia kontinua duni mandatu maka nia sei fokus halo planu estratejiku Dezenvolvimentu ne’ebe diak liu, no konsola estadu no governu atu fo atensaun diak liu ba Polisia. 

“Ita tenki fo kondisaun diak atu ita nia membru sir abele hala’o servisu diak liu,” Longuinhos afirma. Komandante Jeral PNTL Periodu daruak ne’e (2007-2013) rekonese, iha progresu barak iha nia mandatu, maibe iha mos dezafius barak ne’ebe presiza tebes atensaun diak liu tan husi governu. 

Longuinhos foti ezemplu, iha Unidade Polisia Fronteira (UPF), ne’ebe to’o oras ne’e sei susar tebes iha kondisaun atu hala’o servisu diak liu.

.