“Lucia Lobato ‘Fanu’ Ukun Nain Atensaun Ba “Mafia” Justisa”

.

Jornal Nacional Diario - Kinta - Feira, 17 Janeiru 2013 

Kondenada Lucia Brandao Lobato, Segunda (14/01), liu ba haruka karta ba orgaun soberania iha Republika Democratico de Timor Leste (RDTL) hodi fanu ukun nain sira atu kuidadu no tau atensaun ba lala’ok justisa iha rai doben ida ne’e. 

Karta ne’e diriji diretamente ba Prezidenti Republika, Parlamentu Nasional, Primeiru Ministru, ho Prezidenti Tribunal Rekursu (TR), inklui Provedoria Direitus Humanus no Justica (PDHJ). 

 “Karta ne’e laos atu husu orgaun soberania ka ukun nain sira halo intervensaun hodi salva hau la bele tama komarka, maibe, aprezenta hau nia rosesu tomak, hahu iha desizaun Tribunal Primeiru Instansia (Tribunal Distritu Dili) to’o Tribunal Rekursu, hau nia intensaun prinsipal ne’e atu alerta estado ida ne’e katak, ita tenki tau matan no haree servisu Tribunal nian ne’e ho nia hahalok tomak,” esklarese kondenada Lucia Lobatu ba Jornalista sira iha nia rejidensia, Bidau, Dili, Kuarta (16/01). 

Lucia halo komparasaun katak, se politiku sira mos halo abuzu de poder, maka dala ruma Tribunal sira mos bele halo abuzu de poder, tanba sira iha poder atu tesi lia. 

Lucia sublinha katak, ema hotu ne’ebe horik iha RDTL ida ne’e tenki hakru’uk ba lei no halo tuir lei, nune’e, Tribunal sira mos tenki aplika lei ho loloos. 

“Se ohin ka aban mak juis sira no Tribunal hasai mandatu kapturasaun bah au, mak hau pronto simu, hau sei haruma hau nia sasan hodi ba toba iha prizaun, maibe to’o agora mandatu ne’e seidauk sai,” afirma Lucia Lobato. Lucia Lobato mos konsidera mafia justica mosu ona iha Timor, tanba durante nia prosesu kazu ne’e iha presigisaun barak. 

“Hau fo ezemplu ida deit mak Ministeriu publiku akuza hau ho artigu abuzu de poder no artigu korupsaun tuir lei Indoensia, maibe TDD hamonu sentesa ka kondena hau ho fali artigu seluk tuir kodigu penal TL nian artigu ba krime partisipasaun ekonomia de negosio,” afriam Lucia Lobato. 

Ezemplu seluk, tuir Lucia Lobato, iha krime ne’e iha ema nain lima mak partisipa hotu, kompostu husi Americo (Lucia nia kaben-red), ho funsionariu nain tolu seluk tan, maibe MP akuza deit mak nia (Lucia Lobato. “Hau konkorda se mak naok povu nia osan, nia tenki ba toba iha prizaun, maibe tenki liu husi prosesu nebe los no tuir lei, haul abele sai fali ‘kambing hitam’ hodi hatudu katak ita nia sistema justisa ne’e lao furak,” hateten Lucia. 

Iha parte seluk mos Lucia la menta ho informasaun balun ne’ebe fo sai media balun katak, Tribunal la halo mandatu kapturasaun ba nia tanba oras ne’e dadaun kondisaun Lucia gravida ona. 

.