PR Husu Labele Haki’ak Baruk Ten Iha TL

.

SAPO TL ho Suara Timor Lorosa’e - 12 de Outubro de 2012

Prezidenti Repúblika (PR) Taur Matan Ruak (TMR), husu ba entidade hotu atu la bele haki’ak baruk ten iha Nasaun Timor-Leste, tamba mentalidade TL nian hatudu baruk-te’en hodi halo servisu.

Xefi Estadu ne’e fó ezemplu funsionariu ne’ebé level diferente, maibé hothotu ezizi aumenta osan, maibé sira rasik la hatene iha eskritóriu ne’e halo saida.

“Tamba ne’e ha’u hateten ba sira, baruk te’en sai tiha, ita labele kria baruk te’en iha ita nia Nasaun, tamba Nasaun ne’e ho ema baruk te’en bele sai a’at liu, tamba ne’e tenki hahú husi ita,” hateten PR Taur, liu husi nia deskursu, wainhira partisipa semináriu ho tema “Kna’ar Sidadaun Ba moris Di’ak”, iha Palásiu Nobre, Lahane, Dili, Kuarta (10/10).

Remata semináriu, kontinua ho serimónia Aniversáriu PR Taur. Iha semináriu nó serimónia Aniversáriu Xefi Estadu, partisipa husi vice-Primeiru Ministru Fernando La Sama de Araújo ho membru Governu balun, Xefi Estadu Maior General F-FDTL Maijor General Lere Anan Timor ho nia kaben, Prokuradora Jeral Ana Pessoa, reitór UNTL Aurélio Guterres, inklui mós estudante UNTL.

.