“Frakeza Governu Povu Kontinua Moris Susar”

.

Jornal Nacional Diario - Kuarta-feira, 10 Julhu 2013 

Povu Timor-Leste to’o ohin loron sei kontinua moris iha susar ninia laran, tanba ne’e frakeiza husi Governu rasik, tan ne’e povu lubuk seidauk bele goza ninia moris iha era Independensia ida ne’e. 

“Hau duvida ho ekonomia rai laran ne’e, tanba dala barak ema sei nafatin ezizi ba governu tanba ne’e bele dehan, katak ida ne’e frakeza husi ita nia Governante sira, Timor-Leste sei depende los ba Governu, liu-liu ba dezenvolvimentu rai ida ne’e, tan ne’e governu presija tau interese ne’ebe maka’s nune’e bele alkansa dezenvolvimentu ba povu iha rai ida ne’e,” Fernando Gomes, nudar estudante UNTL, Fakuldade Fisipol, hato’o lia hirak ne’e ba JNDiatio Tersa (9/7), Kampus Indus UNTL, Caicoli, Dili. 

Nia dehan, durante ne’e kresimentu ekonomia iha rai laran la nesesariu ona ho kondisaun moris povu nian, tuir nia katak, moris povu ninia sei kotinua susar ne’e laos kauza husi povu kiik sira, maibe planu Governu nia ne’ebe dala barak la tau atensaun ba povu kiik sira. 

Iha fatin hanesan, Marcelina de Jesus nuudar estudante Direitu hateten, durante ne’e nia rasik senti ekonomia Timor ne’e seidauk sufisiente no ema barak mak sei eziji hodi hadia sira nia vida moris liu-liu ba povu kiik sira, tan ne’e husu atu tau matan ba povu kiik sira iha area rurais, tamba realidade povu barak mak sei moris iha kiak no mukit nia laran. 

“Hau husu ba governu, liu-liu atu tau matan nafatin ba povu iha area rurais sira atu nune’e bele hetan benefisiu oituan hodi bele halo mudansa ba moris loro-loron nian,” katak nia. 

Nune’e mos Mateus dos Santos, Fakuldade Edukasaun hatutan katak, ita ukun an tinan 10 ona maibe buat hotu lao sei marka pasu hela, tan ne’e susar tebes atu hadia kresimentu ekonomia iha rai laran,” dehan nia. 

Ba kestaun ne’e la’os estudante deit mak preokupa povu nia moris, maibe sosiedade sivil inklui membru PN mos preokupa, tanba ho kresimentu TL nian ne’ebe sa’e tun halo povu kbiit laek labele goja.

.