“PM Xanana Taka Portaun Palacio Ba Funsionariu”

.

Jornal Independente - Kinta - Feira, 17 Janeiru 2013

Primeiru Ministru Kay Rala Xanana Gusmao taka portaun Palacio governu ba direitores no Xefe Departementu inklui funsionariu iha gabinete Primeiru Ministru tanba tama servisu tarde.

Hanesan baibain oras servisu iha Palacio Governu liliu gabinete Primeiru Ministru hahu husi tuku 7:30 to’o tuku 8:00 funsionariu tenki serviso ona. Maibe kuarta (16/01), Primeiru Ministru xanana Gusmao tama servisu tuku 7:30 dadersan seidauk iha funsionariu.

Haree ba cleaner sira ne’ebe hamoos rai iha palasiu deit maka tama servisu uluk, PM Xanana autoriza seguransa iha palacio governu hodi tama metin protaun (odamatan) Palacio Governu nian hodi banku Diretores no funsionariu ne’ebe tama tarde tenki fila ba uma.

Tuir fontes kredivel ida iha palacio Governu hateten, ba Jornal INDEPENDENTE katak, PM Xanana hirus hodi taka portaun tanba diretores funsionariu sira estadu fo kondisaun hanesan kareta no motor inklui konbustivel maibe servisu tama tarde nafatin.

Tuir observasaun diariu ne’e iha terenu hatudu katak, portaun palacio Governu horsehik taka metin no seguransa metin husi seguransa sivil sira la fo autorizasaun arbiru ba ema atu tama.

Taka portaun palacio ba funsionariu no Ministru sira ne’ebe tama tarde laos foin dala ida maibe iha governu anterior mos xefe governu taka uluk portaun ba Ministru no sekretariu Estadu ne’ebe maka tama tarde iha enkontru Konsellu Ministru.

.