“Lucia Lobato Rejeita Gravida”

.

Jornal Timor Post - Kinta - Feira, 17 Janeiru 2013 

“Asosiasaun HAK Lalika preokupa bah au atu gravida ka la’e, se gravida mos hau hanoin ne’e grasa maromak nian,” arguida eis Ministra Justica Lucia Lobato esklarese.,” mai agora hau diak hela halo servisu uma laran hodi haree hau nia oan sira,” nia hatutan. 

 Eis Ministra Justisa Lucia Lobato rejeita informasaun ne’ebe fo sai iha publiku katak, kondisaun saude gravida ne’e la loos, tanba termu Identidade Rezidensia (TIR) ne’ebe tribunal aplika ba kontinua hela iha uma, hodi hein desizaun ikus husi tribunal. 

 “Se hau nafatin TIR, hau iha diretu atu sirkula ba ne’ebe deit ka livre ba teritoriu ka estranjeiru hau nian direitu, naran katak hau labele sai liu husi loron 15, se liu husi loron ida ne’e hau tenki informa ba Tribunal diresaun foun ne’ebe hau atu ba,” nia dehan ba Timor Post no JND iha nia hela fatin, Bidau Dili, Kuarta (16/01). 

Lucia hatutan, mesmu nia hetan TIR maibe kontinua ho boa-vontade no hanoin diak lakohi sai ba distritu no estranjeiru, ho intensaun hakarak hein deit iha uma hodi atende karik iha notifikasaun ka mandatu detensaun ruma husi Tribunal, nia pronto kumpri responsabilidade iha prizaun. 

Nia mos rejeita informasaun ne’ebe koalia ba media balun katak, nia kondisaun saude gravida, nune’e juis sira impede nia atu tama lalais komarka. Nia husu ba asosiasaun HAK atu klarifika informasaun ne’ebe fo sai ba publiku husi fontes ida ne’ebe? 

Tanba agora dadaun nia kondisaun diak no nunka gravida. Nudar mos membru Asosiasaun HAK, Lucia dehan misaun asosiasaun HAK atu sai defeza ba diretus humanus, entaun HAK tenki haree ba sidadaun ne’ebe nia diretu violadu husi Tribunal. 

Nia husu mos, karik Asosiasaun HAK hakarak hatene prosesu tomak ba nia kazu, nia iha disponiblidade atu oferese kopia, atu ho matenek neebe HAK iha bele halo analiza hodi haree katak Tribunal ne’e nudar duni fatin ikus ba asegura sidadaun nia direitu ka lae. 

Tuir desizaun Tribunal Distrital Dili, Lucia Lobato sei simu kastigu komarka deskonfia halo korupsaun hodi fo tender ba nia learn kaben, durante assume kargu hanesan membru governu iha Aliansa maioria Parlamentar (AMP). 

.