“130.000 Joven Dezempregadu no La Kontinua Eskola”

,

Jornal Independente - Kinta-feira, 23 Maiu 2013 

Reitor Universidade Nasional Timor Leste (UNTL), Aurelio Guterres hateten, situasaun ne’ebe Timor Leste enfrenta husi tinan 2000 to’o 2013 iha area edukasaun no dezempregu aas tebes, tanba, kada tinan joven kuaze 10.000 mak la servisu no la kontinua eskola. 

Nia esplika katak, durante tinan 13, estudante ne’ebe hasai kursu husi ensinu sekundariu hamutuk 13.000 ro’o 15.000, maibe estudante ne’ebe tama Universidade kada tinan 5 de’it, ne’e signifika rihun 10 namkari hela iha Timor Leste. 

 “Joven agora dadaun ne’e ema dehan iha hela situasuan no kondisaun dezempregu (Pengaguran terselubung),” dehan nia bainhira partisipa Work shop preparsaun annual 2014 kada Ministeriu, iha sentru Konvensaun Dili (22/5). 

Tuir Aurelio, maske TL enfrenta dezempregadu barak, maibe problema laiha tamba gvernu iha politika atu apoiu sira no joven barak mak hela ho familia nebe sei hetan netik nesesidade moris loro-loron nian. 

Nune’e, Reiror UNTL ne’e husu ba Governu, liu-liu gabinete Ministeriu Finansas, liu husi dirasaun Analiza Makro Ekonomia presiza haree asuntu ne’e ho seriu, tanba bele fo impaktu ba estabilidade TL iha futuru. 

“Agora problema prinsipal ba ita ne’e maka oinsa no se bele karik ita lao neineik tuir ita nia kapasidade, tanba dala barak ita nia referensia ba fali ita nia osan bot, maibe la haree ita nia kapasidade,” tenik nia. 

Tanba, nia dehan, kapasidade mak limitadu, maibe governu aloka osan boot ne’e, signifika osan hirak ne’e sei sulin hanesan bee, maibe povu sei la hetan benefisiu. 

.