Timor Selu U$20 “PN Preokupa Kareta Kupang-Atambua Livre Taxa”

,

Jornal Nacional Diario - Tersa-Feira, 28 Maiu 2013

Reprezetante povu iha Parlamentu Nasional (PN) preokupa ba kareta Kupang-Atambua tama mai Timor livre husi taxa, maibe kareta husi Timor ba Kupang-Atambua selu U$20.

“Ita ba sira (Kupang-Atambua) loron ida deit tenki selu U$20, hau hanoin ida ne’e Governu kompotenti tenki haree asuntu ida ne’e para pelumenus bele mos iha buat ruma ba ita, laos sira deit mak tenki simu ho kareta U$20, hau hanoin susar tebe-tebes ita nia komunidade sira,” deklara deputada bancada CNRT, Virginha Anabela iha ninia intervensaun plenaria, Segunda (27/5).

Virginha hateten, tuir lolos kareta husi Kupang-Atambua mai Timor mos tenke selu taxa, tanba dala ruma sira tula sasan ne’ebe mak todan nune’e husu Governu toma atensaun ba asuntu ne’e.

“Tula sasan barak hanesan ne’e estraga ita nia alkatraun hotu, maibe ate data nein atu fo U$1 deit mos la iha, ita husik ida ne’e ba tempu naruk tan,” nia dehan. Iha fatin hanesan Deputadu Bancada FRETILIN, Antoninho Bianco preokupa mos asuntu ne’e, tanba ne’e konsidera grave, nune’e husu ba Governu kompotenti atu toma atensaun ba kestaun ne’e.

“Kareta liu-liu ne’ebe mak mai husi ita nia maluk sira husi Indonesia tama durante ne’e to’o agora dehan laiha deveris atu selu buat ruma, ne’e grave ne’ebe Governu tenki haree ho seriu ida ne’e,” haklaken deputadu Bianco.

Nia parte preokupa governu la implementa regras ba kareta husi Kupang-Atambua tama mai Timor seidauk estabelese regras, nune’e kareta sira ne’e livre ka la selu. “Se durante tinan hira ne’e ita la preokupa ne’e tanba sa? De propozitu ou inkapasidade instituisaun atu estabelese regras ida atu halo kobransa ke afavor ba reseita Estadu,” koalia Bianco.

Entertantu, ba kestaun refere Prezidenti Komisaun D trata ba asuntu ekonomia no dezenvolvimentu, Jacinta Abu Cau Pereira konsidera asuntu ne’e parte Governu kompotente tenki toma atensaun seriu hodi estabelese regras.

 “Ida ne’e Governu tenke hare ona tanba ita rasik atu hakat ba linha Fronteira kareta ida deit, ita tenke selu U$20 depois sira nia ne’e tama mai ho kareta boot lori sasan ne’ebe mak todan i estraga mos ita nia dalan, entaun governu tenki hahu ona hare tanba, ita tama ba sira nia ita selu, tanba sa mak sira la bele selu? haklaken deputada Jacinta.

 ,