“Xanana Lakohi Ona Fakar Osan Arbiru”

.

Jornal Independente - Segunda-feira, 27 Maiu 2013 

Primeiru Ministru (PM) Xanana Gusmao promete sei la repete tan eru Governu Aliansa Maioria Parlamentar (AMP) nian ne’ebe utiliza osan estadu latuir nia dalan. 

 “Ohin loron mos kala ita boot sira rona, tanba sa mak governu ida ne’e para boot ida boot teb-tebes, ida ne’e tanba iha nesesidade, i hau husu publiku nia oin, ba membru governu sira atu hatuur didiak ba buat sira ne’e, tenki iha kordenasaun didiak iha Ministeriu sira nia laran, la’e, ita la serve atu ukun,” dehan nia. Xefe Governu koalia ida ne’e bainhira lidera materia desentralizasaun poder lokal, iha Distritu Dili, Sabadu (25/5) iha Sentru Konvensaun Dili. 

Xanana rekonese katak, durante governu anterior AMP to’o kintu governu ida ne’e, osan barak mak governu gasta la tuir nia dalan, hodi osan sira ne’e sai nabeen hotu. Maski fakar osan barak, xanana halo analiza ba konstrusaun Estadu, bele hateten katak, tinan sanolu resin Timor ukun an, buat balun halo ho diak maibe buat balun sei faille. 

“Maibe mos ita tenki rekonese katak, osan barak mak ita fakar deit, tanba ne’e mak ohin ba aban no futuru, presiza ita hare ita nia malpratikas iha administrasaun no jestaun, tanba ita monta tiha ona sistema kontrolu ida ne’ebe mak seidauk efetivu,” sublinha PM Xanana. 

Atu hadia, tuir Xanana hateten, tenke reve karatek Timoroan, reve ninia hahalok hodi kuriji sala sira ne’ebe komete tiha ona. 

“Tenki halo mos analiza kritiku ida katak, osan balun gast ho diak, maibe osan balun lalika kestiaona no lalika husu tanba sa, ne’e hanesan nesesidae boot ida atu responde ekilivre iha ita nia sosieade,” tenik Xanana. 

 Tanba ne’e, Xefe do Governu ne’e husu ba responsavel governu ne’ebe kaer osan estadu nian, ho programa estadu nian atu komesa hadia an ona. Aliende ne’e, kona ba Municipio, xanana dehan atu halo mudansa ba kampo korupsaun husi nivel sentral to’o nivel lokal. Ida ne’e importante tebes atnba governu no estadu hakarak tilun labele manas tan, bainhira tuun to’o iha baze hodi haree, estadu ida ne’e sei monu. 

 “Risku boot iha ita nia Timor laran tomak mak ita iha osan, fator ida ne’ebe fo vantazen ba ita atu hala’o didiak ita nia planeamentu dezenvolvimentu, ida ne’e risku boot tebes, tanba it abele ba hotu hemu tasi been,” tenik Xanana. 

Iha sosializasaun munisipiu, Xanana konsidera tinan ida ne’e atu hadia uma laran, tanba ne’e husu ba seitor privadu atu prepara an didiak ona. Setor privadu tenki hakbiit an iha jestaun, labele manan tiha osan oituan kobre ba projeitu sira ne’ebe lao ladun diak, lao ba mai ona ho kareta ne’ebe mesak diak deit, hodi defende fali ba projeitu foun. 

“Nasaun ida ne’e sei presija atu dezenvolve iha setor hotu-hotu, no presija muda ema hotu nia mentalidade, tanba ne’e seitor privadu tenki kretaivu atu oinsa mak bele reinveste,” realsa Xanana.

.