Haluan Aeroportu “Familia 1,114 Paniku”

.

Jornal Timor Post - Kinta-feira, 23 Maiu 2013 

Eurico da Costa de Jesus, Xefe Suku Komoro sub Distritu Dom Alexo, Distritu Dili hateten, familia uma kain 1,114 ho total abitantes 10.780 oras ne’e sente paniku ho planu governu atu hasai sira husi hela fatin, tanba atu haluan aeroportu Internasional Nicolau Lobato, Comoro, Dili. 

“Populasaun paniku, tanba foin rona sosializasaun kona ba planu ne’e, populasaun sira mos seidauk hatene, karik governu sei fo kompensasaun ka lae?” 

Eurico hateten ba jornalista sira iha nia servisu fatin Comoro, dili, foin lalais. Area ne’e kompostu husi Aldeia 4, Anin-Fuik, Beto Tasi, Tera Santa no Rosario mak afetadu. 

Entertantu, reprejetante povu iha Uma fukun Parlamentu nasional husu ba governu atu kria kondisaun hela fatin ba populasaun sira, antes muda sai. 

“Ita nia governu tenki kria kondisaun diak ba populasaun sira husi aeroportu, tenki halo estudu ida, atu povu hela iha uma ida ho konfortavel, labele halo uma hanesan programa MDG, ne’ebe oras ne’e vuneravel sira la kohi uza,” dehan Inacio Moreira ba Diario Timor Post iha PN, Kuarta (22/5), relasiona ho tuir planu governu nia atu harii uma 1,000 ba benefisariu sira. 

Maske nune’e deputadu ne’e husu ba populasaun sira atu ho konsensia hodi nune’e governu bele haluan tan Aeroportu tuir estandarte Internasional. 

Iha fatin hanesan, deputadu paulino Monteora Soares babo, husi bancada PD hatutan, governu atu hasai komunidade husi Tasi tolu ba Beto tasi, tenki iha lina kordenasaun interministerial, hanesan Ministeriu Justisa, Ministeriu Solidaridade scial ho Ministeriu Transporte no komunikasaun. 

“Loloos estadu prepara uluk fatin, maka foti desizaun atu hasai sira, presiza mos iha negosiasaun diak,” nia dehan tan. 

Hatan kona ba kestaun ne’e, Vice Ministru Transporte no Komunikasaun (MTK), Flavio Cardozo Neves promete sei responsabliza hodi prepara fatin ba populasaun aldeia 4 ne’ebe afeitadu ba konstrusaun Aeroportu Internasional Nicolao Lobato. 

“Fatin atu prepara, antes atu halo konstrusaun aeroportu populasaun sira tenki destaka ona ba fatin seluk, sei koordena ho Terrsa Propriedades, atu buka mekanismu diak hodi rezolve problema ne’e,” Flavio dehan iha nia kna’ar fatin. 

.