“Ana Pessoa Sai Asesora PR Taur”

.

Jornal Nacional Diario - Kinta-feira, 23 Maiu 2013 

Eis Prokuradora Jerald a Republika (PJR), Ana Pessoa, hetan fiar husi Prezidenti da Republika Taur Matan Ruak atu bele sai asesora ba nia iha parte justica nian, tanba ne’e, Ministeriu Jistica pronto kolabora hodi dezenvolve seitor justisa iha rai laran. 

“Sr. Prezidenti da Republika mos hatete bah au katak Sra. Eis Prokuradora Jerald a Republika sei tulun Prezidenti da Republika, liu-liu Sr, Prezidente iha kestoens de Justisa nian enjeral, tanba ne’e hau hanoin diak tebe-tebes, tanba ita iha aset ida Dra. Ana Pessoa ne’ebe iha esperensia matenek no ema ida que hanoin diak teb-tebes hakarak halo hadiak rai ne’e iha seitor Justica,” esplika Ministru Justisa, Dionisio Babo ba Jornalista sira iha Palacio Prezidensial Aitarak laran, dili, Kinta (22/5) hafoin hala’o enkontru ho Xefe Estadu Taur Matan Ruak. 

Eis Prokuradora Jeral Republika sai asesor Prezidenti Republika mak Ministeriu Justica sei kolabora maka’as tebe-tebes ho Prezidenti da Republika liu husi nia Asesor ne’e iha futuru par abele halo mudansa iha laran. 

Dionisio Babo afirma katak, MJ sei kolabora maka’as teb-tebes ho gabinete Prezidenti Republika liu husi eis PJR Ana Pessoa ne’ebe mak sei apoiu Prezidente da Republika iha seitor Justisa nian iha tempu besik par abele hadiak setor justica ne’ebe sei la’o kadiik hela. 

MJ Dionisio Babo rasik rekonese katak, iha mudansa balun no prepara atu halao reforma iha organizasaun judisiariu kona ba estrutura Tribunal nian, funsionamentu juiz tomak, nune’e iha futuru abranje ba teritoriu para atende povu sira. 

Aliende ne’e, Ministru ne’e mos informa, situasaun justisa en jeral konaba reformas ba ambitu Ministerio ida-idak, ne’ebe to’o oras ne’e MJ halo dadauk buat balun hanesan estudus konaba reorganizasaun iha diresaun balun iha Ministeriu nia laran, halo mudansa balun iha sistema divizaun tarefas ho diskusaun tarefas ne’ebe mak tenke iha ba ema ida-idak ne’ebe serviso iha Ministeriu laran. 

Antes ne’e eis PJR, Ana Pessoa hala’o enkontru ona ho Xefi Estado no iha enkontru ne’e Xefe Estadu husu ba eis PJR atu fo apoiu iha setor justisa. Ho nune’e, eis PJR ne’e ho laran kontente tanba xefe Estadu Taur Matan Ruak kontinua fo konfiansa ba nia hodi apoiu setor justisa, tanba ne’e Ana Pessoa hateten, nuudar Timoroan nia sei apoiu iha setor refere hodi nune’e bele dezenvolve diak liu tan iha setor justisa Timor Leste nian. 

Tuir eis PJR ne’e katak, Justisa iha Timor lao diak ona maibe presiza hadiak nafatin iha kestaun balun, nune’e sai mellor iha futuru. 

.