“Afonso-Mateus Kandidatu Forte Ba Komandante PNTL”

.

Jornal Independente - Tersa-Feira, 28 Maiu 2013 

Segundu Komandante Jeral Polisia Nasional Timor Leste (PNTL) Komisariu Afonso de Jesus ho Superintendente Xefe Mateus Fernandes sao kandidatu forte ba komandante jeral PNTL foun. 

Tuir ofisiais PNTL ida ne’ebe lakohi publika nia naran hateten, tuir informasaun ne’ebe nia hetan katak, komandante Afonso so Superintendenti Xefe Mateus mak sai kandidatu forte hodi troka komandante Jeral Komisariu Longuinhos Monteiro. 

 “Hau fira katak iha semana oin publika bele hatene ona se mak atu sai komandante foun tanba sei desidi iha konsellu Ministru,” hateten fontes ne’e iha Kuartel jeral PNTL Kaikoli (27/5). 

Entertantu, iha segunda (27/5) Primeiru Ministru xanana Gusmao mos aprejenta ona naran komandante foun ba Prezidenti Republika, xefe Governu ne’e seidauk bele anunsia naran ba publiku tanba sei deside liu husi konsellu Ministrus. 

Hanesan mos fontes anonimu ne’e dehan, maske PM hato’o ona ba PR mos seidauk bele fo sai ba publiku, wainhira seidauk iha desizaun konsellu Ministru nian. Maske nune’e nia dehan, depende ba PM Xanana nu’udar Ministru Defesa no Seguransa (MDS). 

“Ita hein deit desijaun husi PM Xanana ne’ebe nudar mos Ministru Defesa no Seguransa mak hili entre sira nain rua ne’e (Afonso no Mateus) ka ema seluk ne’e ita hein de’it,” dehan fontes ne’e. 

Entertantu, Komandante PNTL Jeral PNTL Longuinhos Monteiro oras ne’e sei assume kargu tranzitoriu hodi hein desizaun PM Xanana Gusmao, mandatu tranzitoriu ne’e sei remata iha loron 27 fulan Junu tinan ne’e. 

.