Konsultasaun Munisipiu Iha Knua Xanana “PM Rekonese Problema veteranu Mosu Tamba Influensia Politika”

,

Jornal Independente - Kuarta-feira, 22 Maiu 2013 

Primeiru Ministru Kay Rala Xanana Gusmao durante konsultasaun kamara Munisipiu iha nia Knu’a, Distritu Manatutu, husu ba Manatutu oan sira atu esforsu aan hodi identifika potensia rekursu ne’ebe Distritu ne’e iha. 

 Xanana dehan, molok simu poder lokal husi Governu Sentral Asosiasaun Klibur Manatuto Anan (AKMA) tenke iha kapasidade hodi identifika rekursu, liu-liu rekursu naturais. “Hau mak sei moe kuandu, ita nia Asosiasaun ne’e la halo servisu para atu hatan ba proposta ne’ebe mak AKMA aprezenta ona ba Governu sentral,” dehan xanana iha manatuto, Tersa (21/5). 

Xanana dehan tempu atu deskansa hotu ona, dadauk ne’e tenki hader hodi servisu maka’as. “Ba oin Governu sentral hein imi nia servisu tuir moto ne’ebe mak imi lansa ona katak, “Tempu Deskansa Hotu Ona, Hader, Hamriik, kaer liman lao ba oin”,” dehan Xanana. 

Entertantu, PM Xanana mos rekonese katak, veteranu iha problema barak ne’ebe sai aat liu tan, tanba hetan influensia husi Partidu Politiku sira. 

“Imi veteranu sira nia problema to’o ohin loron sai boot, ne’e tamba partidu politiku sira mak fahe imi, sira mai lori imi halai ba mai, imi la hanoin imi nia kna’ar loloos,” dehan xefe Governu ne’e ba veteranu sira. 

Nia husu ba veteranu sira tenki hametin unidade no forsa papel atu kaer metin nafatin prinsipiu luta ba ukun an. 

 “Ba oras ne’e dadaun, hau hatene katak, partidu demokratiku iha nia veteranus, FRETILIN iha nia Veteranus, CNRT iha nia veteranus, nune’e mos iha partidu seluk iha veteranus, ne’e tamba demokrasia, maibe veteranu tenki tau nia aan hanesan pozisaun libertasaun nasional,” katak nia. 

 Xanana husu ba veteranu sira atu tenke hamriik firme no fo liman ba malu atu bele hakat ba dalan munisipiu. 

“Hau lakohi rona tan veteranu manatutu oan sira tanba deit artidu politiku imi fahe malu, se hau rona ida ne’e hau hirus imi,” nia dehan.

,