“MS Distribui Aimoruk Liu Prazu”

.

Jornal Timor Post - Kuarta-feira, 22 Maiu 2013 

Diretora Sentru saude Laklubar (SSL), Distritu Manatuto, Almerinda Pereira hateten, durante ne’e sira nia parte simu aimoruk husi nasional (Ministeriu Saude), liu ona prazu no balun hela fulan ida atu liu prazu, diretora ne’e mos lamenta tanba MS Distribui aimoruk la tuir pedidu ne’ebe mak iha. 

“Durante ne’e ami simu aimoruk husi nasional balun expire (liu prazu), balun hela fulan ida atu expire no mos aimoruk ne’ebe ami husu la haruka mai, aimoruk ne’ebe ami la husu sira haruka fali ida ne’e mai,” dehan Almerinda ba Jornalista sira iha nia servisu fatin, sesta (16/5). 

Diretora ne’e hatutan katak, problema hanesan ne’e laos foin mak akontese maibe beibeik ona. “Sira haruka mai la sufisiente, tanba tuir ami nia atendementu pasiente loron id abele atende pasiente hamutuk 500 ba leten, tanba ne’e, tuir aimoruk Triwulan nia bele uza deit semana ida, aimrouk hirak ne’e hanesan amoksilin, parasetamol no kabun moras nian,” Almerinda sublina. 

Ho problema hirak ne’e, nia informa, dala barak pasiente sira sempre preokupa no hiruk mediku sira tanba laiha aimoruk, solusaun ba problema ne’e diretora ne’e haktuir, mediku sira sempre fo seit aimoruk antibiotic atu tahan netin pasiente sira nia moras. 

Ho probelam refere, Diretora jeral ne’e sente deskontente ho servisu Ministeriu Saude nian, tanba fo impaktu ba sira atu atende pasiente ne’ebe presiza mos atu hetan atensaun emerjensia, nia husu ba MS atu kria mekanizmu ida, nune’e transferensia aimoruk ne’e labele to’o tarde. 

Diretora ne’e mos husiu ba MS atu hadia jestaun, tanba ho problema falta aimoruk ne’e perigozu, tanba iha fulan ida rua bele mortalidade as, husu mos ba MS atu distribui lolos aimoruk tuir pedidu ne’ebe sentru saude sira husu.

.