“ADN Rekonese Falha”

.

Jornal Nacional Diario - Sesta-feira, 24 Maiu 2013 

Diretor Ajensia Dezenvolvimentu Nasional (ADN) Samuel Marcal rekonese, durante ne’e falla iha implementasaun projeitu emerjensia no Prohrama Dezenvolvimentu Lokal (PDD) I ho II 2012 iha teritoriu laran, barak mak laiha kualidade no laiha dezenu ho BOQ (Build Of Quantity). 

“Sira Parlamentu foti kestaun balun iha problema duni, hanesan projeitu balun dezenu la kondis ho terenu i balun falla, buat sira ne’e hotu ita rekonese katak akontese duni,” Samuel Marcal ba Jornalista sira iha Parlamentu Nasional, Kinta (23/5) hafoin halo audensia ho membru parlamentu husi komisaun E ne’ebe trata asuntu infraestrutura transporte no komunikasaun. 

Realsiona ho failansu hirak ne’e, ADN komesa harii ona ekipa ida ne’ebe kompostu husi enzineiru Timor-oan, Indonezia ho jepaun atu halo vizita konjunta ida iha Distritu 13 para hare direta projeitu ne’ebe laiha kualdiade. 

 Nia hatutan, liu husi vizita ne’e ho objetivu atu haree kestaun fallansu tekniku no mos atu rezolve par abele atinji kualidade projeitu hotu tuir ita nia hakarak, ba oin ADN, obra publiku ho komisaun E sei iha kordenasaun diak. 

“Ami nia ekipa ida mos komesa ba ona iha Jakarta para sosa material balun atu utiliza hodi teste ba konstrusuan sira ne’e, iha duni nia kualdiade ka lae, kuandu la iha kualidade, pasensia tenki sobu para ba futuru, bele hadia diak liu, no mos atu eduka ita nia emprezariu sira servisu ho responsablidade,” afirma nia. 

 Preokupasaun emprezariu sira kona ba ADN kua sira nia osan, Samuel hateten, projeitu balun mak ADN koa sira nia osan tanba iha dezenu husu osan montante boot, maibe ADN tun Berifika volume la hanesan. 

Nia mos rekonese katak, projeitu balun mak PN aprova tiha ona, maibe iha implementasaun ADN laos hola kompetensia deputadu sira nian, maibe montante osan tau hanesan istimativa deit, tan ne’e ADN halo verifikasaun hodi ajusta ho dezenu ne’ebe iha. 

Projeitu ba 2011, nia dehan, ADN konsege halo poupansa osan kompania sira nian kuaze U$62 miloens, iha 2012 U$12,042 miloens, ba projeitu 2013 seidauk iha relatoriu. “osan sira ne’ebe koa sei fila ba kofre do estado, laos ba ema ida nia bolsu,”nia esklarese. 

Alende ne’e, Diretor ADN sublinha tan katak, sansaun ba kompania ne’ebe halo projeitu laiha kualidade, ADN la halo pagamentu no mos kompania ne’ebe abandona projeitu ADN fo lista metan, tinan oin la bele fo tan projeitu governu nian. 

Entertantu, rezultadu fiskalizasaun komisaun E ba projeitu sira iha Distritu 13 laiha kualidade liu pursentu 50, tanba ne’e, husu inkeretu Parlamentar ba Governu atu responsabliza. 

,