“PM Xanana Rekonese Dezempregu Aumenta”

.

Jornal Independente - Kuarta-feira, 22 Maiu 2013 

Primeiru Ministru (PM), Kay Rala Xanana Gusmao rekonese katak, dezempregu aumenta iha Timor Leste sai hanesan problema ida. 

Maski nune’e, Governu la iha forsa atu fo servisu ba ema hotu, maibe seitor privadu maka sei ajuda governu hodi fo empregu. 

Xanana Gusmao koalia ida ne’e, bainhira lidera material kona ba poder lokal no desentralizasaun iha salaun Igreija Manatuto, Tersa (21/05). 

 Xefe Governu ne’e mos la esplika detallu numeru dezempregu hira mak kada tinan sa’e. Governu sempre tau matan ba setor privadu sira iha area formasaun planeamentu, atu nune’e bele hasa’e kapasidade hodi kuidadu ba finanseira. 

“Hau husu ba ita boot sira setor privadu ne’e, tenke prepara an, kapasita an, presiza harii tan empreza ki’ik balun tan, hodi bele hetan osan orituan-oituan,” katak nia. 

Aleinde ne’e, Xefe Governu mos husu ba seitor privadu atu labele dependensia demais ba projeitu, maibe presiza iha hanoin ne’ebe foun, hodi bele harii buat foun iha povu nia leet. “Se imi kada tinan imi hein deit governu fo projeitu, susar ita atu halo mudansa ba dezenvolvimentu, agora politika munisipiu no poder lokal atu la’o ona, maske sei iha prosesu sosializasaun, maibe imi seitor privadu mak tenki hatene an hodi bele halo netik buat ruma iha implementasaun munisipiu ne’e,” tenik Xanana. 

 Primeiru Ministru mos sujere ba setor privadu sira komesa agora tenki hadia ona kualidade no kuantidade molok Distritu Manatutu simu Munisipiu. 

“Munisipiu nia forsa mak setor privadu sira, se imi setor privadu la forsa, Munisipiu Distritu Manatutu sei la la’o, tanba ita boot sira mak sei jere rekursu natural ne’ebe iha liu husi rekursu humanus ne’ebe kada empreza prepara,” tatoli Xefe Governu ba Emprezariu Manatutu. 

,