“Xanana: Dili Keta Mehi Atu Sai Munisipiu”

.

Jornal Independente - Segunda-feira, 27 Maiu 2013 

Primeiru Ministru Kay Rala Xanana Gusmao triste tebes ba hahalok povu Distritu Dili, ne’ebe laiha neon hodi hatudu nasionalismu ba sira nia rain rasik, kapital Dili nakonu ho foer no is animal nia foer deit. 

Ho komunidade Distritu Dili nia hahalok ida ne’e, PM Xanana hateten katak, kapital Dili lalika mehi atu sai munispiu, maibe 2030 mak Munisipiu foin too iha Distritu Dili, tanba komunidade iha Distritu ida ne’e rasik seidauk prepara an. 

“Iha kapital Dili ita hotu preokupa bainhira ita temki kapital nomos zona espesial, hakaas an ba hamos ita nia rain hodi sensiabiliza ita nia sidadaun, maibe kuandu hanesan ne’e nafatin, imi 2013 mak sai munisipiu foin to’o, tamba imi seidauk prepara an,” informa PM Xanana. 

Bainhira hanoin kona ba saude, maibe bairo laran kontinua foer hela, labarik kiikoan sira moras ba beibeik, dehan PM Xanana, sabadu (25/50 iha Sentru konvensaun Dili (CCD), bainhira sosializasaun programa Desentralziasaun no poder lokal. 

Xanana mos rekonese, populasaun iha Distritu Dili sei fraku iha mentalidade, no presiza iha edukasaun sivika, atu nune’e komunidade sir abele hadomi ambiente natureza. 

 Xefe Governu husu ba populasaun Distritu Dili atu labele hein deit programa dollar U$3, mai mak ida-idak foin hamos ninia kintal laran, ne’e signifika hakarak osan deit, ne’e labele. Kapital Dili ne’e animal sira laho kahor malu ho ema deit, animal sira tama soe foer to’o varanda mos nain sira husik deit, tamba programa dollar 3 seidauk to’o. 

 “Hau husu ba imi labele hein deit programa dollar tolu to’o mak imi foin book an hodi hamos imi nia kintal, depois liu tiha imi halo foer fila fali hodi hein fali doalr tolu,” husu Xanana. 

Nia dehan tan, fahi, bibi, karau sira ne’e sei especial ba povu iha Distritu Dili, municipiu mos sei especial segi negatidu nian,” tenik xanana. Xanana sublinha, Municipiu Distritu Dili diferente tebes ho Distritu sira seluk, tanba Dili potensial tebes ba area turizmu. 

 “Distritu Dili hanesan jestaun de kuzinha, tamba membru governu sira ne’e, dadersan matabesu mak foin hanoin saida mak sira atu halo iha loron ohin,” xanana realsa. 

“Kuandu ita la bolu atensaun ba malu, ema balun hanoin sira iha tiha ona fulan nia leten,” tenik Xanana. 

Xanana mos fo hatene hela ba povu Distritu Dili katak, esplikasaun ne’ebe nia esplika maka la halo tuir, Distritu Dili sei sai munisipiu iha tinan 2013.

.