Tratamentu Lucia “TR Haruka Ona Notifikasaun”

.

Jornal Timor Post - Sabadu, 25 Maiu 2013 

Tribunal Rekursu (TR), Kinta (23/5) haruka ona karta Notifikasaun ba Hospital nasional Guido valadares (HNGV) atu haree kestaun sobre pedidu kondenada eis Ministra Justisa Lucia Lobatu ne’ebe husu atu halo tratamentu saude iha Singapura. 

Advogadu Jose Pedro Camoes hateten, kontiudu husi Notifikasaun TR ne’e atu husu opiniaun doutor sira iha HNGV ne’ebe trata Lucia Lobatu atu fo sira nia opiniaun katak, loos duni ka la’e fasilidade iha HNGV labele fasilita operasaun Lucia. 

Aleinde ne’e, husu tuir rejultadu tratamentu ne’ebe durante ne’e dotor, sira halo hatudu realidade Lucia LObatu nia saude grave duni ka lae?

“Notifikasaun ne’e Tribunal hakarak konfirma fali dotor sira katak, fasilidade operasaun iha HNGV ne’e la sufisiente duni ka lae? no oinsa lucia nia saude tuir dotor sira nia hare, entaun dotor sira bele fo konkluzaun hafoin Tribunal rekursu foti desizaun,” Advogado Jose camoes ba Jornalista sira iha Tribunal Distrital Dili, Sesta (24/5). 

Camoes espera, Tribunal Rekursu bele foti lalais desizaun hodi fasilita nia kliente ba halo operasaun iha Singapura, tanba moras ne’ebe Lucia sofre la’os foin mosu maibe kauza kedas husi operasaun dala rua ne’ebe hala’o antes ona iha Ospital Elisabeth Singapura. 

 Entertantu, antes ne’e, Lucia Lobatu hateten mesmu ema barak kestiaona ba nia pedidu atu halo tratamentu saude iha estranjeiru no mos ema balun sente katak, nia saude la importante atu bal halo tratamentu, maibe nudar inan nia familia ho oan sira presiza nia prezensa nudar inan diak iha familia laran, entaun tratamentu saude importante ba nia no familia tomak.

.