Kazu Abuzu de Poder no Pekulatu “Borlaco Hata’an Iha Tribunal”

.

Notisia Husi TVTL - Tersa-Kalan, 28 Maiu 2013

Tribunal Distrital Dili (TDD) hala’o primeiru audensia julgamentu ba kazu abuzu de poder no Fraudi Fiskal ne’ebe deskonfia envolve husi eis Diretor Geral Finansa de Estadu atual Sekretariu estadu Fortalesementu Institusional, Francisco da Costa Soares ‘Borlaco’. 

Primeiru Audensi julgamentu ne’ebe hala’o ba loron ohin hodi rona uluk sasin liu husi arguidu nain 2, inklui Sekretariu estadu Fortalesementu Institusional Francisco da Costa Soares ‘Borlaco’ no Diretor kompania Tierra Suplay Lda, Mariano Malik ba kazu sosa kareta ba Ministeriu Edukasaun iha tinan 2009 ne’ebe Ministeriu edukasaun propoin sosa kareta kameneta 3 hodi fasilita programa merenda eskolar ho osamentu U$ 89.250 (Rihun walu nolu resin sia pontu atus rua lima nolu), montante orsamentu ne’e kontradis ho invois ne’ebe hatama husi Kompania Sinar Rias husi Indonesia ho Valor kada kareta U$16.304 ekivalen ho juta 150 Rupiah.

Diferensia montante ne’e, Ministeriu Publiku akuza Sekretariu estadu Fortalesementu Institusional ne’ebe momentu ne’eba hanesan Diretor Jeral Financas do Estadu hodi asina envois, hodi aprova osan hamutuk U$89.250, maske nia funsaun laos ona hanesan Diretor Nasional Aprovizionamentu ne’ebe kargu refere sefia husi Manuel Monteiro, ne’ebe simu posse iha loron 18 fulan Maiu 2006.

Audensia julgamentu ba kazu ne’e, Prejidi husi Juiz koletivu Jacinta Correia, Antonio Helder no Juli Gantes.

 Entertantu, Ministeriu Publiku reprejenta prokuradora Gloria, ba Jornalista arguidu Francisco Soares ‘Borlaco’ hateten, pronto atu kolabora ho Tribunal.

“Hau nia prejensa mai ne’e atu fo resposta ba konsensia ne’ebe mak KAK halo i Ministeriu Publiku, ohin hau tenki mai hataan iha Tribunal, tamba Tribunal mak fatin lia los, hau nu’udar ukun nain hau tenki hakruk, hau tenki respeita lei i respeita instituisaun, saida deit mak lao, hau tenki lao tuir, ida ne’e maka it abele dehan, ukun mak ida ne’e, para futurumente it abele lao diak, forsa ba estadu, forsa ba governu, akuzasaun mai hau dehan katak, hau abuzu de poder fraudi fiskal, pronto, akuzasaun ne’e bele los mais lia los iha Tribunal, tribunal mak sei desidi, kualker deiszaun hau pronto tamba ne’e konsekuensia nu’udar kaer ukun,” dehan Borlaco.

Iha julgamentu ne’e, arguidu Francisco Soares Borlaco akompania husi defensor publiku Andre Kancio Xavier, sorin seluk Diretor Kompania Tierra Suplay Lda reprejenta husi advogadu Privadu Afonso Gomes Fatima.

Francisco Borlaco ba hatan iha Tribunal sein uza imunidade to’o prosesu hotu, kazu refere sei kontinua hodi rona tan testamunha ne’ebe aprejenta husi Ministeriu Publiku no parte defeza.

.