TL Lori Australia Ba TI; “Hein Resposta, PM Xanana La Fo Komentariu”

,

Jornal Nacional Diario - Kuarta-Feira, 29 Maiu 2013 

Primeiru Ministru (PM) Kay Rala xanana Gusmao lakohi fo komentariu kona ba pozisaun Timor Leste (TL) nian ne’ebe mak foin dadauk ne’e deklara sai husi Ministru Petroliu no Rekursu Minarais (MPRM), Afredo Pires, atu lori Australia ba Tribunal Internasional (TI) konaba akordu Certain Maritime Agreement Timor Sea (CMATS) ne’ebe mak hala’o husi TL no nasaun vizinu Australia hodi halo explorasaun ba mina Timor nia iha tasi. 

 PM Xanana afirma katak, nia la fo komentariu tanba sei hein resposta husi Nasaun Australia relasiona ho karta komunikadu ne’ebe mak nia (Xanana-red) haruka ona ba nasaun Australia. 

Xefi Governu hato’o kestaun ne’e ba jornalista sira iha Palacio Prezidensial Aitarak laran, Dili, segunda (28/5) hafoin hasoru malu ho Prezidenti da Republika Taur Matan Ruak. 

“Hau sei hein resposta husi governu Australia, imi kala haree iha komunikadu husi Governu dehan katak, sira sei fo resposta lai, hau hein hela, hau seidauk bele halo komentariu ida-idak tanba hau hein hela ida ne’e,” informa PM Xanana. Antes ne’e, MPRM Alfredo Pires, deklara ona katak, TL oas ne’e dadauk hetan ona advogadu husi Inglatera atu bele defende diretu povu TL nian iha Tribunal Internasional (TI), tanba konsidera akordu CMATS laos direitu fundamental ara nasaun Australia kaer metin. 

Maske nune’e MPRM, Alfredo Pires afirma katak, sei kontinua halo negosiasaun ho Australia hodi rezolve problema akordu CMATS antes TL lori Australia ba TI.
.