27 Junu 2013 “Longuinhos La’os Ona Komjer PNTL”

.

Jornal Timor Post - Sabadu, 25 Maiu 2013 

Komandante Jeral (komjer) Polisia Nasional Timor Leste (PNTL), Longuinhos Monteiro tenki remata nia kargu, iha 27 Junu 2013, molok atu hetan komandante foun, Ministru Defesa no Seguransa, Xanana Gusmao (atual Primeiru Ministru), se halo uluk enkontru ho Prezidenti Republika, Taur Matan Ruak. 

Sekretariu Estadu Seguransa (SES), Francisco Guterres hato’o informasaun ne’e, Sesta (24/5) ba Jornalista sira iha Dili, hafoin enkontru Konsellu Superior hamutuk ho Primeiru Ministru, Xanana Gusmao, enkontru ne’e hala’o kuaze oras lima nia laran. 

Hanesan ita hatene, komandante Jeral PNTL, Longuinhos Monteiro iha fulan tolu kotuk, hala’o mandatu tranzitoriu, hodi hein prosesu atu hili fali komandante jeral PNTL foun, ofisiais 10 resin, ohin loron sai kandidatu komandante PNTL foun. 

“SES Guterres esplika tan katak, tinan 4 Longuinhos Monteiro assume pasta nu’udar komandante Jeral PNTL, no iha periodu tranzitoriu Longuimhos kontinua assume fali poder hanesan, maibe, desizaun ikus, nia sei remata mandatu ne’e iha 27 Junu 213. 

Kona-ba sei mak sei troka Longuinhos, Guterres hateten, oras ne’e prepara dadaun prosesu atu hili komandante foun, maibe, kandidatu sira ne’e, sei hili liu husi kompetisaun, hafoin prosesu hotu remata, mak sei halo hanunsia ba publiku kona ba rezultadu, se loos mak sai komandante PNTL foun. Maske nune’e, Francisco Guterres la kohi atu fo kandidatu komandante jeral PNTL sira nia naran. 

“Ne’e segredu, ami nia konsentrasaun sei haree liu ba mandatu tranzitoriu ikus, ne’ebe Longuinhos assume hela,” dehan nia. 

Tuir informasaun, iha futuru Longuinhis sei assume fali kargu seluk kona ba seguransa.,” hau lakohi halu espekulasaun, se lae, bele mosu-runggu rangga, hau lakohi koalia ida ne’e, tanba ser ita fo sai ona, sei mosu buat barak,” dehan nia. 

Iha parte seluk, SES informa katak, Fulan Junu ba oin PNTL sei responsablidade atu jere rasik uma laran, liu husi prosesu formasaun sira. 

“Husi fulan Junu, PNTL iha ona hanoin atu jere rasik ninia funsaun, tanba lei fo ona dalan, agora ami prepara hela kondisaun balun, atu prosesu ne’e la’o diak tan,” nia dehan. 

Benefisiu husi entrega poder ne’e, mak bele jere ho diak kapasitasaun professional no labele mosu bei-beik problemas, no membrus PNTL tomak bele satesfas ho prosessu ne’e,” nia hatutan. 

.